Batakang Oryentasyon Kabahin sa Kampanya Batok Droga (Part 1)

Batakang Oryentasyon Kabahin sa Kampanya Batok Droga Pinaagi sa: SKP 2 GKK-based Rehabilitation Support Programme

Ang Kahimtang

Sulod sa dugay nga panahon, ang problema sa gidili nga droga ang nagahulga sa atong nasud. Apan karon lang nato natugkad ang kalapad ug kalalum niini nga nituhop sa atong mga katilingban.

Bisan si Pangulong Rodrigo Duterte ang nakugang sa dihang iyang nahibaloan nga 94% sa mga barangay sa nasud ang apektado na sa problema sa droga ug sobra tres milyones ang mga lunod na niini. Matud pa sa Department of Interior and Local Government (DILG) nga sa mga nisurender nga mga nagagamit ug nagatulod sa gidili nga droga, 90% kanila ang nagagikan sa mga dysfunctional families o problemadong mga pamilya.

Mao kini ang mga pamilya diin kulang ang panahon ang ginagahin sa mga ginikanan sa pag-amoma sa mga anak tungod sa panglimbasog nga mokita aron ikabuhi sa pamilya. Nagapanghitabo kini sa mga kabus ug adunahang mga banay. Apan ang pag-amoma dili lamang ang pagbuhi sa pamilya kay lakip niini mao ang paggahin og kwalidad nga panahon usab diin magiyahan ug mahatagan og mga maayong panig-ingnan ang mga kabataan aron modako sila nga responsable, matinahuron ug produktibong membro sa ilang pamilya ug katilingban.

Ang lain usab nga hinungdan mao ang barkada nga kung adunay mahilambigit niini sa ginadili nga droga, dako ang posibilidad nga makakat-on usab ang ubang membro sa paggamit niini.

Dili mahimong pasagdan kini kay kung magpadayon ang pagsangkad niini, daw kanser, sa hilum hinay-hinayon nga kaunon niini ang atong katawhan ug nasud. Unsa na lang unya ang kaugmaon sa atong mga kabataan, sa umaabot nga henerasyon ug sa atong nasud?

SKP 2 Fun Day

Gipahigayon ang Sagop Kinabuhi Program 2 (SKP 2) Fun Day didto sa Eden Nature Resort niadtong imaging bulan.

Gipangulohan sa Archdiocesan Social Action Center (ASAC), University of Southeastern Philippines (USeP), partner agencies, ug mga barangay, malampuson nga napasiugda ang mga kalihukan uban sa 52 ka mga boluntaryo nga mi-surrender aron magbag-o nga naggikan sa nagkalain-laing barangay sa Distrito sa Talomo ning syudad.

Pinaagi sa santos nga misa, pagpamalandong, team-building activities, parlor games, sports ug uban pa, nahimong sadya ug mahinungdanon ang maong kalihukan ilabina nga aktibong misalmot ang mga surrenderees ug mga representante sa mga partner agencies. (Nonoy Rodriguez, ASAC volunteer)