Ang Tinuod nga Kahulugan sa Kagawasan

6TH Sunday in Ordinary Time
Sir 15:15-20/ 1 Cor 2:6-10/ Mt 5:17-37

Matagtawo gihatagan sa Diyos ug kagawasan, busa aduna kitay kagawasan nga buhaton ang buot natong buhaton. Ang unang pagbasa nga kinutlo gikan sa basahon ni Sirac nagkanayon nga “makahukom ka kung magmatinumanon ka ba sa Diyos o dili…” Maingun nato nga usa ka dakong risgo ang gibuhat sa Diyos sa dihang gihatag Niya sa tawo ang kagawasan, tungod kay sayud Siyang daan nga mahimong abusuhon sa tawo ang maong kagawasan. Apan bisan pa man niana misugal Siya sa tawo.

Ang kagawasan nga gihatag sa Diyos kanato, usa ka kagawasan nga maghimo unta sa tawo nga responsible sa pag gamit niini. Apan sayud kita sa atong kasinatian nga ang tawo sama ka daghang higayon, wala nahimong responsible sa paggamit sa maong kagawasan, nga tungod niini misulod ang sala sa kinabuhi sa tawo, ug nunot sa sala anaa ang nagkadaiyang kasamok, kagubot, kagutom, gubat, mga hiwi nga binuhatan, ug ang kamatayon nga mao gayud ang bunga sa pagpakasala sa tawo.

Ang responsible nga pagpadayag sa atong kagawasan makab-ot lamang sa tawo kung kini giniyahan sa kaalam ug kinaadman sa Diyos. Mao kini ang kaalam nga gitudlo ni San Pablo ngadto sa mga taga-Corinto diha sa atong ikaduhang pagbasa. Adunay mga tawo nga naghuna-huna nga ang tinuod nga kagawasan makita diha sa pagbuhat gayud sa bisan unsa nga imong gusto bisan pa gani ang pagpakasala. Apan ang kinaadman sa Dios magtudlo kanato nga ang tinuod nga kagawasan naa diha sa pagpaningkamot sa pagtuman sa kabubot-on sa Diyos, tungod kay gihatag sa Diyos ang kagawasan, aron ang tawo gawasnon nga mopili kaniya. Nan sa ato pa, ang tinuod nga kagawasan anaa sa gawasnong pagpili sa tawo sa Diyos. Ang pagbuhat ug sala sukwahi sa kagawasan nga gihatag sa Diyos, tungod kay kini nagpadayag nga ikaw ulipon sa sala.

Diha sa atong Ebanghelyo gihisgutan ang nagkadaiyang paagi nga makasala ang tawo. Giklaro diha sa Ebanghelyo nga ang sala mahitabo una diha sa kinahiladman sa tawo. Kung pananglitan aduna kay dakong kasuko sa usa ka tawo nga buot nimo siyang patyon, bisan pa ug wala nimo siya patya sama ra nga sad-an ka sa salang pagpatay, mao kini ang ginatawag nga “Murder by Intention.” Ingun usab niini diha sa salang pagpanapaw. Bisan pa ug wala ka magbudhi sa imong kapikas sa kinabuhi, apan kun magpunay ka’g tan-aw sa usa ka babaye o lalaki, uban sa law-ay nga huna-huna, nakapanapaw ka sulod sa imong kasing-kasing.

Kini ug ang daghan pang okasyon o kahigayunan sa pagpakasala makapaulipon sa tawo. Nan ang hagit kanato mao gayud ang pagtalikod ug paglikay sa pagpakasala, aron gawasnon kitang makatuman sa kabubot-on sa Diyos, kay sumala sa atong Salmo, “bulahan sila nga nagatuman sa balaod sa Ginoo”, sila mao ang tinuod nga gawasnon!