4 ka Mensahe sa Birhen sa Fatima gipadayag

Sama sa kalipay nga gibati sa parokyano sa arkdiyasesis/dayosis sa Dabaw ug Digos, miabot ang replica sa Birhen sa Fatima sa Our Lady of Fatima Parish niadtong Pebrero 12. Naghalad sila ug mga bulak sa Mahal nga Birhen dayon nag ampo sa Santos nga Rosaryo. Misunod ang Santos nga Misa nga gipangulohan ni Bishop Wilfredo Manlapaz, Obispo sa Dayosis sa Tagum. Dako ang kalipay ni Bishop Willy sa pag-abot sa Birhen. Nanghinaut siya nga dili lang unta ang replika ang dawaton sa katawhan, kundili mismo si Birhen Maria ug ang iyang mensahe.

Matud pa usa ka pamilya nga gikan sa Maragusan, gipanalanginan sila pag ayo sa Mahal nga Birhen ug gipangandoy nila na ubanan sila niya sa kanunay.

MENSAHE SA FATIMA

“Matag adlaw paniguruhon nga mahimuot ang Ginoo sa imo. Estudyante, tungha sa eskwelahan sa saktong panahon. Trabahante, ang pag Facebook nga naa sa opisina nga dili labot sa trabaho, dili makapahimuot sa Ginoo. Ginikanan, ang pag-ampo sa buntag ug bag-o matulog,” kini matud pa sa World Apostolate of Fatima (WAF)-Philippines National Formator, Charles Lorzano diha sa orientation una pa man nagsugod ang Misa.

Dugang ni Lorzano nga ang mensahe sa mga pagpakita ni Maria sa Fatima niadtong 1917 mao ang musunod: 1) Pag-ampo sa Santos nga Rosaryo; 2) Pagbalaan sa katungdanan; 3) Pagdebosyon sa Putling Kasingkasing ni Maria pinaagi sa pag apil sa kalihukan sa unang Sabado sa bulan, ug 4) Pagsul-ob sa Brown Scapular.

Gibalhin ang replika sa dayosis sa Mati niadtong Pebrero 15. (Earna Rose Cadungog, La Paloma Mensajera | Tagum)