Unang pista sa Sagrado Corazon de Jesus Nazareno Parish gisaulog

Hiniusang prusisyon sa Tagum gihandum sa Traslacion

Wala nakapugong ang Bagyong Auring sa kabaga sa ihap sa tawo nga mitambong sa kapistahan ni Hesus Nazareno sa Diyosesis sa Tagum. Di man sama kadaghan sa miapil sa Quiapo, apan gidugok gayud ang kinaunhang pagsaulog sa pista sa replica sa parokya sa Sagrado Corazon de Jesus Nazareno Parish sa Brgy. Apokon, Tagum, niadtong Enero 9.

TRASLACION

Human ang novena masses gikan Disyembre 31, kaadlawon pa lang, gisugdan na ang prusisyon kon “Traslacion” sa Parish of Christ the Eucharistic King (Old Cathedral).

Ningmata na si Bonifacio Santillana aron sa pagtambong ug pagsaksi niini. Matud pa niya dako kaayo ang iyang kalipay tungod sa maong pagsaulog sa Poong Nazareno nga dungan sa ilang ika-46 nga wedding anniversary. Kini nakahatag ug dugang kahulogan sa iyang pag-apil sa prusisyon sa pagsinati sa diwa sa iyang pagka Kristiyano.

Pinangunahan ang karo/andas kapulisan ug banda gikan UM-Tagum, ang ruta nga nagsugod sa PCEK misubay sa Rizal St., Sobrecarey St., Pioneer ug padulong na sa Bermudez Apokon diin nahimutang ang Sagrado Corazon nga parokya.

Gituyo nga iagi sa mga daang dalan sa Tagum ang Traslacion. Sumala pa sa kura paroko nga si Fr. Emerson “Em-em” Luego, nga nangunay ug tungtong sa karo aron sa pagdawat sa mga panyo nga itrapo sa nawong sa replica, kini aron mabalik ang hiniusang pag-ampo samtang manlakaw. “Sukad sa nahimo nang 9-10 ang quasi parishes, nawala na ang tradisyon sa hiniusang prusisyon.”

FIESTA MASSES

Dose ka misa ang padayon nga gisaulog sulod sa adlaw sa kapistahan. Kapin tres mil ka mga deboto, bisita ug mga lumilihok ang nangapil sa mga aktibidad gikan pa sa novena, prusisyon, ug mga Misa.

Alas 8 sa buntag miabot ang Poong Nazareno sa Sagrado Corazon dayon gisugdan ang pontifical mass ni Bishop Wilfredo Manlapaz, uban ang 16 ka pari gikan sa Diyosesis sa Tagum.

“Ayaw mo panguli nga wala ninyo mahunghong kang Hesus ang inyong gipangayo pinaagi sa replica. Apan ayaw lang pag ampo alang sa inyong kaugalingon, iampo sab ang uban.” Kini ang unod sa wali ni Bp. Wilfredo Manlapaz, Bishop, Diocese of Tagum sa unang kapistahan sa parokya sa Sagrado Corazon de Jesus Nazareno Parish niadtong January 9.

Dugang pa ni Bp. Manlapaz nga si Jesus ang pinakabililhong gasa nga madawat sa usa ka tawo. Busa nanghinaut siya nga mahisama kita kaniya, masinugtanon sa Amahan. “Siya miingon, ‘learn from me for I am humble of heart…not my will, but Thy will be done,’” matud ni Manlapaz.

Matud pa ni Fr. Luego nalipay siya pag-ayo kay gawas sa daghan ang mitambong nga deboto, hapsay ang prusisyon tungod sa kooperasyon sa GKK/parish leaders, kapulisan, kasundalohan, ug mga parokyano. Nagpasalamat usab siya sa coverage sa midya hilabi na sa official media partner nga mao ang Davao Catholic Herald newspaper ug DXGN 89.9 Spirit FM.

Matud pa ni Chita Tagaod, katekista sa usa ka parokya sa Tagum ug kasamtangang coordinator sa ilang grupo sa debotante ni Hesus Nazareno, dako ang iyang kalipay kay kaniadto sa TV lamang nila kini makita, apan karon nakasaksi na gayud sila ug nahiuban pa sa traslacion sa Poong Nazareno nga gikan pa gayud sa Quiapo, Manila. Walay gipangayo nga lain ang usa pa ka deboto kundili ang kaayohan ug kalinaw sa mga tawo ug iyang pamilya.

Ang replica sa Itom nga Nazareno nga gipangayo ni Bp. Manlapaz kang Cardinal Luis Antonio Tagle gidala sa parokya sa Brgy. Apokon, Tagum niadtong Disyembre 3, 2016. Gawas sa Cagayan, mao na kini ang ikaduhang parokya sa Nazareno sa Mindanao.

EPEKTO SA PAGSAULOG

Nahiusa ang mga batan-on sa parokya tungod sa selebrasyon. Sumala ni Dyna Arcena, core group member sa Diocesan Youth Apostolate, nagtabang sila sa food packing ug pagbutang ug banderitas sa mga kalsada. Sa adlaw sa pista, nanghatag pud sila ug sobre aron halad-pasalamat.

Ang assistant priest sa Our Lady of Assumption Parish, Tagum nga si Fr. Dioscoro Bocod, mipaambit nga ang pagsaulog sa kapistahan “senyas sa daku kaayong gugma sa Ginoo sa katawhan; kinsang andam mutahan sa Iyang kinabuhi bisan magpalansang sa krus. Kita unta mubawos unta ug mudawat kaniya. Ang matag usa mudawat ug mutuo unta kang Kristo,” panapos niya.

Gihan-ay ang mga aktibidad ug liturhiya subay sa pagsaulog sa Nazareno sa Quiapo. Napili ang Tagum nga mahatagan ug replica sa Hesus Nazareno gikan didto tungod kay aktibo man kini sa disaster response. “Sa pagkakaron kining parokya center sa disaster response in Mindanao CBCP-NASSA nga ipahitabo na pud puhon ang inter-clergy national basketball tournament diin duna tay proyekto nga maghimo ug social action hall at the same time disaster center gani pasalamat ta kay niaging Sabado apil sa Signal number 1 apan sa pangaliya ni Jesus Nazareno, ang bagyo nilihis. “Salamat sa tanan ug dili unta mo muhunong ug tabang sa tanan,” panapos ni Fr. Luego. (Earna Cadungog | Danica Magadla | La Paloma Mensajera, Tagum)