Tuig sa Parokya gilunsad

Nagmisa si Yanong Muloy sa parokya sa San Pablo, Disyembre 24. (Kuha ni Alvin Hondos)

Mga igsoon ko diha ni Kristo dinhi sa Archdiocese sa Davao, malipayon ako nga muhatag kaninyo niining mensahe kabahin sa atong paglunsad dinhi sa Archdiocese sa tuig nga atong ihalad alang sa parokya isip usa ka komunyon o panaghiusa sa mga katilingban, o sa eningles pa, ginganlan kini nga tuig, The Year of the Parish as Communion of Communities.

Kining atong paglungsad atong himuon labi na diha sa mga kalihukan sa liturhiya sa hapon ug gabii sa Enero 1 nga mao ang pagsaulog sa Solemnidad sa Mahal nga Inahan sa Diyos, ang Birhen Maria.

Mga igsoon, tuguti ako sa pagpadayon sa pagsulti kaninyo nga kining tuiga alang sa parokya isip komunyon o kahiusahan sa mga katilingban, kabahin kini sa siyam ka tuig nga pagpangandam nato alang sa tuig 2021. Kining pagpangandam, gilangkuban sa siyam ka tuig, ug kining tuiga karon mao ang ikalima nianang siyam ka tuig.

“Nagaawhag ako kaninyo nga atong hatagan ug tumang pagtagad uban sa malipayong pagsalmot ug pag apil apil sa mga kalihukan niining tuiga, nga sama sa akong giingon, The Year of the Parish as Communion of Communities tungod niining pipila ka mga hinungdan.”

Una, kini gideklarar sa Catholic Bishops Conference of the Philippines (CBCP) alang sa tibuok nasud nato. Nagpasabot kini nga sa makausa pa, gipakita ug gipadayag sa CBCP, ang pundok sa tanang kaobispohan sa Pilipinas ang ilang pagdawat, ug pag ila, ug pag endorsar sa GKK o BEC nga usa ka bag-ong pagpadayag sa kinabuhi nato isip Simbahan.

Ikaduha nga rason, dili lang ang CBCP lagi ang nagpadayag niini. Duna nay mga pronouncements o pagpadayag ug pagpanudlo ang pipila ka Santo Papa, nga malipayon nga nag-ila sa lig-on ug maayo nga epekto, nga kon dunay mga GKK o BEC diha sa atong mga parokya.

Sunod nga rason, ug kini mas init ako, ug malipayon akong mubungat niini, mao nga sa daghang mga panahona, kini g’yud ang kasinatian sa Archdiocese sa Davao. Ato kini. Buhi kini nga kasinatian ang gihimo nga tema nining tuiga, busa uban sa dakung pagpapasalamat, ug daku nga kahinam, musalmot kita niining tuiga tungod kay lagi dili kini lisud nato apan atong kinabuhi na, kining mga GKK diha sa atong mga parokya.

Apan ang sunod na rason mga igsoon, uban sa panghuna huna sa atong Santo Papa nga hatagan gyud pagtagad katong mga naa sa layo, naa sa kilid o wala gani, tua na sa gawas sa ingon ta katilingban nato, ang mga GKK mao ang usa gyud ka maayo nga paagi diin ang mga matuohon nato, ang atong mga igsoon, nga napahilayo, o tua na sa mga hilit hilit nga lugar sa atong Archdiocese, ang mga katilingban nga gagmay, ug sa daghang mga higayon, mga katilingban nga kabus, pinaagi sa atong paghatag ug pagtagad sa mga BEC o GKK nato, kining sitwasyon sa pagkagamay, pagkamedyo nakalimtan, medyo sinalikway ug ang kinabag-an sa mga tawo nato nga naa pa sa kakabus pinaagi sa atong paghatag ug pagtagad diha sa atong mga GKK, kining sugyot o panlantaw sa atong Santo Papa nga muadto kita niadtong mga tawo nga medyo kulang sa pag atiman ug kulang sa atong presensya.

Kining atong paghatag ug higayon alang sa atong mga parokya ug pagpaamgo alang natong tanan niining kaanindot sa atong parokya isip kahiusahan o komunyon sa mga katilingban, ang atong translation niana — kining atong mga GKK sa Dabaw, pagka anindot jud nga okasyon nga mapalambo ug mapabuhi gayud nato ang atong pagtoo dinhi sa Archdiocese sa Dabaw!

Mga igsoon, mabungahon ug malipayon pagpalungsad niining maong tuig sa parokya isip komunyon ug kahiusahan sa mga katilingban, malipayon nga pagsaulog niini uban sa panalangin ug espiritu sa atong balaan nga Diyos.