Traslacion sa Davao gihandum nga hiusahon

Ang kapistahan sa Itom nga Nazareno sa Sta. Ana Shrine Parish didto sa Sta. Ana Avenue, Davao City gisaulog, niadtong Enero 9.

Atol sa selebrasyon, gipahigayon ang Traslacion (prusisyon) sa hapon nga gisundan sa Santos nga Misa.

Ang naasoy nga parada gitambongan sa mga debotante sa Nazareno nga gikan pa sa nagkalain-laing dapit sa siyudad sa Dabaw.

“Perting daghana. Daghan lang gyud nagukod gukod. Bisag asa mi maabot daghan nagagukod na mga devotees,” sumala pa ni Sis. Melanie Montillo, usa sa mga nag organisa niini.

Naobserbahan nga ang ihap sa mga tawo nga nangapil sa prusisyon padulong sa Uyanguren St. mibaga, hangtud sa mibalik kini sa Parokya.

Nalipay ang mga nagorganisa tungod sa kadaghan sa nanambong kumpara sa mga niaging tuig, ingon man ang mga deboto tungod sa kahan-ay ug kalinaw sa dagan sa parada.

Sa pagpangutana nganong nag-apil siya sa prusisyon, gisulti ni Marilyn Amorada, taga Boulevard nga kini, “tungod sa gugma nako sa Ginoo. Dugay nakong nangalagad. Sobra na traynta (30) ka tuig.” Ang iyang pagkuyog gihimo na niyang panata sa kinabuhi aron matubag ang iyang mga pag-ampo kada tuig.

“How I wish the Archdiocese will group it as one. Probably we will have it at our main in San Pedro (Cathedral),” panghinaut pa ni Montillo. Kini tungod kay nagbulag bulag pa man ang mga prusisyon sa Nazareno sa pagkakaron dinhi sa siyudad. Hangyo usab niya nga magkahiusa ang tanang deboto sa paghigayon ug prosesyon sa kapiyestahan niini.

Ang Itom nga Nazareno nagasimbolo sa matag usa sa katawhan nga adunay krus na ginapas-an. “Basta moduol ko sa iyaha magsige man ko ug ana nga Lord tabangi ko ug pas-an sa akong krus. Mao na nga duol kaayo ko sa Iyaha. Nigaan gyud (ang akong gibati),” sumala sa usa pa ka deboto nga si Consolacion Clapano.

Ang pagparada sa Itom nga Nazareno unom na ka tuig nga ginapahigayon sa maong Parokya sa kapiyestahan nga ginahandum matag Enero 9 sa tuig. (Fresa May Momo| HCDC Intern)