Sinulog sa Cebu, simbolo sa pagtoong Pinoy

Malipayong gisaulog sa mga Cebuanos ang ika-452 nga Fiesta Señor niadtong Enero 15, 2017. Ang kapistahan sa Diosnong Bata ginasaulog sa tibook lungsod ug nasud matag ikatulong Dominggo sa Enero.

Gisugdan ang siyam ka adlaw nga novena niadtong Enero 5 pinaagi sa “Penitential Walk with Jesus” gikan sa Fuente Osmeña padulong sa Basilica Minore del Santo Niño de Cebu. Human sa alas 7 sa gabii nga nobena, ang mubo nga traditional Sinulog ang nagapabibo sa gawas sa Simbahan.

Ang “Penitential Walk with Mary” gipahitabo Enero 13, alas 4 sa kaadlawon, dayon gipahigayon ang “Traslacion” sa imahe sa Sto. Niño ug sa Birhen sa Guadalupe paingon sa National Shrine of Saint Joseph sa Lungsod sa Talisay. Sa bisperas, Enero 14, gisugdan sa pantalan duol sa National Shrine of Saint Joseph ang fluvial procession paingon sa Pier Uno. Didto giprusisyon ang duha ka imahe padulong sa Basilica, dayon gibuhat ang reenactment sa unang misa, bunyag ug kasal. Pagkahapon gihimo ang Solemn On Foot Procession sa milagrosong Imahe nga gisundan ug Pontifical Mass ni Bishop John Du, Obispo sa Palo.

Sa adlaw’ng piyesta, Enero 15 ang mga Misa gipangulohan ni Arsobispo Jose Palma, arsobispo sa Cebu. Gawas sa mga aktibidades nga gipahigayon sa Basilica, gibuhat sad ang Sinulog Grand Carousel (floral float). Gihimo ang misa pasalamat sa Mahal nga Señor sa kalampusan sa iyahang piyesta Enero 16 ug ang Ritual sa Hubo, Enero 19. Kini ang kinatapusang aktibidad diin kaliguan ug bistihan na sa simpleng sanina ang imahe ni Sto. Niño de Cebu. Ang pagsaulog, replica sa debosyon sa mga Pilipino labi na sa Batang Hesus. (Lawrence Vidanes | DC Herald Volunteer)