Rehistro sa mga Katolikong Pamilya

Niining tuig sa parokya 2017, mahinungdanon kaayo ang gipangayo nga pagparehistro sa tanang pamilyang katoliko. Dako kaayo kini nga datos alang sa gitinguha ug gilauman nga kalamboan ug kabag-ohan sa mga parokya isip nagkahiusang katilingban sa mga katilingban.

Pinaagi niini mahibaloan og klaro ang porsyento sa mga lumulopyo nga mga katoliko. Maila usab pinaagi niini kinsa kadtong nagkinahanglan og dugang pagtagad gikan sa mga nangalagad sa parokya. Mao kini sila ang mga katoliko nga panagsa ra maoapil sa kalihokan sa parokya, mga nangundang nang magbansay sa pagtoo ug sila nga wala lang kahibalo unsa ang balansayon sa usa ka katoliko. Kasagaran, mao usab sila ang wala nangilabot sa GKK sa ilang mga dapit gipuy-an.

Kining maong pagrehistro, una sa tanan, kaakuhan sa mga nangalagad sa parokya. Sila ang kinahanglan magpahigayon niini. Ug adtoon nila ang matag panimalay aron ipahayag ang katuyuan ug kapuslanan nga marehistro ang mga pamilya.

Wala maanad ang mga katoliko niini. Mao nga daghan kanato ang mga katoliko nga “at large” o “in general.” Sa ato pa walay klarong gigamutan nga katilingban, ni parokya. Matingala na lang sila, ngadto ngadto, sa panahon nga magpabunyag, magpakompirma, o magpakasal sila, pangayuan sila og permit o GKK ID. Busa, ayohon gayud ang pagpasabot niini. Dili gamiton aron paninglan sa amot o monthly dues. Ang kinauyukan nga tuyo niining pagrehistro mao ang pagkahibalo kinsa, asa, ug pila ang mga ginsakpan sa parokya nga tulubagon ug tagdon sa Simbahan alang sa pagsangyaw sa Ebanghelyo, pag santos sa ilang kinabuhi, ug pagtagad sa ilang panginahanglang spirituwal.

Hinumduman nato nga ang Ika-2 Konsilyo Plenaryo sa Pilipinas (PCP II) nagtudlo nga, “ang parokya usa sa labing importanteng paagi ug luna alang sa pagbag-o ug pagpalambo sa Simbahan. Dinhi makanunayong masinati sa magtotoo ang tanang pagpangalagad ug kinabuhi sa Simbahan. Sa matag diyosesis, ang parokya maoy naandan nga luna diin ang mga magtotoo nagatigum aron molambo sa kasantos, moapil sa misyon sa Simbahan ug masinati nila ang simbahanong panaghiusa.” (PCP II, 598).

Ang usa ka kamatuoran nga motumaw gikan niining pagrehistro mao ang gidaghanon sa mga ginsakpang katoliko nga adtoonon ug tagdon pa aron madasig nga mahiapil ug mahiusa sila usab sa malipayong katilingban ni Kristo. Ang gidaghanon sa mga mosimba nga katoliko sa makadaghan magpakompyansa nga daghan kaayo ang nagabansay nga katoliko. Apan ang tinood, mas daghan pa ang wala na o wala pa.

Mao ni nga mag-ampo gayud kita sa tag-iya sa anihonon nga magpadala pa og dugang pang mangangani kay daghan pa kaayo ang anihonon. Madugangan pa unta ang atong mga laykong alagad nga katekista ug evangelizers, mga FLA workers, laykong ministro sa liturhiya, mga nangalagad sa kalooy, mga Relihiyoso, ug mga Pari.

Ayaw kamo kahadlok sa pagparehistro, mga igsoon. Alang kini sa atong kaayuhan ug sa dugang kahiusahan sa Simbahan diha sa katumanan sa iyang misyon sugod sa matag pamilya, sa GKK ug sa parokya.