‘Pasko Fiesta sa Dabaw’ sa Malabog

Malipayong gisaulog ang “Pasko Fiesta sa Davao City” alang sa mga lumad sa Barangay Malabog, nga gitambungan sa 3 ka barangay nga mao ang Barangay Sumimao, Fatima ug Malabog nga mga sakop sa San Roque Parish, Malabog. Nagsugod kini niadtong Disyembre 7-21, sa Malabog gym nga gisugdan sa ritwal sa 5 ka datu sa mga lumad.

Sumala ni Mr. Andrew Desales, CSSDO social worker sa Paquibato District, pagboot ni Mayor Sara Duterte nga sa Malabog pagabuhaton ang ekslusibong aktibidad alang sa mga lumad aron mahilikay sila sa disgrasya ug sakit. Di na sab sila malayo sa ilang pamilya.

Pinangulohan ni Kapitan Jessielito Areja, uban pang nagtabang nga ahensya mao ang ang CSSDO, City Health, City Engineer’s Office, City Agriculture’s Office, ug uban pa.

Matud pa lumad nga si Analie Lintuan, 25 anyos, nga taga Brgy. Sumimao, nalipay siya nga sa Malabog gipahigayon ang Pasko Fiesta ni Mayor “dili init, dili lisud ang tulugan ug makatrabaho pa siya sa ilang balay.”

Si Erlinda Adang, 50 anyos, nga Sitio Bansi, nalipay sab sa programa diin sila nagpakita sa ilang talento, pagdula, ug pagtan-aw sa video nga nagpunting sa pag-atiman sa kinaiyahan.