Pamilya sa parokya, gihiusa

Holy Family, Baliok nagsaulog sa ika-12 nga kasumaran

Ang parokya sa Sagrada Pamilya nagsaulog sa ika-12 nga kapistahan niadtong Disyembre 30, 2016. Kini gisugdan sa nagkalahi-lahing aktibidad sa matag katilingban sama sa panaw-duaw sa Sagrada Pamilya niadtong Nobyembre 13 ug gitapos pinaagi sa selebrasyon sa Christian Community (CC) Day.

Subay sa tema, “Ang Pamilya nga Gibalaan sa Kaminyoon ug Gilig-on sa Kalooy sa Ginoo diha sa Santos nga Eyukaristiya,” ang selebrasyon gigahin usab isip usa ka adlaw sa pamilya diin ang mga pamilya magkatapok ug magkauban sa pagdula ug pag apil sa nagkalahi-lahing aktibidad dili lamang aron malingaw, apan hilabi na gayod nga mulambo sa buluhatong ispirituwal.

Ang mga unang mga adlaw sa novena gisulod sa Misa de Gallo, samtang ang ulahing adlaw gitapos pinaagi sa pagprosesyon sa mga patron sa tanang GKK sa parokya kauban ang Sagrada Pamilya.

Sa mismong adlaw sa pista, santos nga misa nga gitambungan sa mga parokyano ang nagsugod niini, dayon ang zumba session isip pag-abli sa “Parish Family Day” nga gihimo sa IWHA Gym sa Dumoy, alas 6:30 sa buntag.

Ang Parish Family Day gilangkuban sa Cheering Contest sa matag Christian Community, Larong Pinoy sama sa Takyan, Kadang-kadang, Buko Relay, Tumba-lata, Pabitin, Palayok ug ang Agawan-biik.

Miduyog usab sa GKK Servant Leaders and pipila ka miyembro sa Davao Diocesan Clergy sa basketball invitational game.

Gitapos ang Family Day pinaagi sa usa ka salo-salo nga giagi sa “boodle fight” sa matag-Christian Community. Ilang gisalohan ang ilang giandam nga kan-on, piniritong isda, adobong manok, ug lumpia shanghai. Ang fight nagsimbolo sa panaghiusa ug kaangayan sa mga parokyano sa parokya sa Sagrada Pamilya.

THANKSGIVING NIGHT

Luyo sa puno nga schedule nga nahitabo sa adlaw sa pista sa Holy Family Parish, malipayong gisaulog sa mga parokyano ang Pontifical Mass, alas 5:30 sa hapon nga gipangulohan ni Abp. Romulo G. Valles, D.D., ang arsobispo sa Archdiocese sa Davao.

Atol sa misa, nagpadayag sa iyang kalipay ang arsobispo sa iyang nakita nga nagsul-ob ug Filipiniana attire ang mga kababaihan ug barong ang mga kalalakin-an, timaan nga ang selebrasyon espesyal ug mahinungdan, butang nga angay kunong ipadayon.

Sa iyang wali, gipahinumduman sa mahal nga Obispo ang kanindot sa mensahe sa Belen nga naghulagway sa Sagrada Pamilya nga maoy hinungdan sa selebrasyon sa Pasko. Dugang pa niya, “nga unta kita mahisama sa Sagrada Pamilya nga kanunay mahimong mainampuon sa Diyos ug kanunay nga mangayo ug giya sa Diyos aron sa pagpuyo sa kinabuhing matarong.”

Gipasabot usab sa arsobispo ang papel sa mga amahan ug inahan sa ilang mga anak nga sama kang Maria ug Jose. “Sila kanunay nang nagmahal ug nag- amuna sa ilang mga anak.”

Iyang gipahinumduman ang mga anak nga magtahod sa ilang mga ginikanan, aron mahimo silang bulahan.
Paghuman sa misa, nagkauban ang mga pamilya sa matag GKK aron sa salu-salo.

Ang matag Christian Community nga naglangkob sa 5 hangtod 6 ka GKK, adunay giandam nga usa ka litson. Busa nahimo sang lechon festival ang panihapon sa parokya tungod kay matag lamesa sa Christian Community adunay usa kabuok nga lechon.

Malipayon kining gisaluhan sa mga pamilyang nitambong ug niduyog sa panihapon.

Pagkahuman, nagpakita ang mga parokyano sa ilang managlahing talento sama sa pagsayaw ug pagkanta. Ang gihimong misa, panihapon ug pasundayag maoy pamaagi sa mga parokyano sa ilang dakong pasalamat sa Ginoo sa pagbobo sa iyang grasya sa tibuok tuig.

Sa kinatibuk-an, nahimong malipayon ug malampuson gayod ang ika-dose nga kapistahan sa Holy Family Parish. (Flor Arellano-Deloria | HFP SoCCom)