Nakalimtan nga unang lakang sa pagtukod og Parokya

Unsa ang gika bisihan sa mga parokya karon?

Walay duda nga ang tubag niini mao una, pagsaulog sa mga Sakramento, ilabi na ang Misa, alang sa mga buhi ug namatay. Ikaduha, pagbisita sa mga gamay’ng katilingban, ilabi na sa ilang piyesta. Ikatulo, ang pag-adto sa mga tulunghaang publiko, diin atua ang kadaghanan sa atong mga katolikong kabataan, aron andamon sila sa pagsaulog sa mga sakramento sa Eyukaristiya ug Pakig-uli ug Kompirma. Ikaupat, pagtambong sa daghang mga meeting sa GKK, sa Zona, sa mga apostolado, mga konseho, sa Vicariato, ug uban pa.

Kini palang daan, tungod sa kadaghan niini nila, ug gamay ra ang mga nangalagad nga Pari, mga relihiyoso, ug mga laykong alagad, puno na ang ilang skedyul ug overloaded na.

Unsa pud ang nasinati pinaagi niini? Tinuod, daghan ang naabot sa pagpangalagad sa parokya, apan mas daghan pa jud ang wala maadtoi, ug maabot. Ang mas daghan, nagpabilin lang nga wala nangilabot, wala kabalo nga apil diay unta sila, ug ang uban, dili jud buot mangilabot.

Ang Kura paroko ug ubang lideres sa parokya hangtod sa mga GKK nga naglangkob niini, dili mahimo nga magpakabuta bungol niining kahimtang. Dili mahimo nga piyongan lang kini og magmantinir lang sa mga anaa sa duol ug apil sa kinabuhi sa parokya. Sa Tuig sa Parokya, kini nga kahimtang mismo ang kinahanglan tagdon ug lihokon. Apan unsay angay buhaton ug sarang mahimo?

Pipila ka mga maayong paningkamot ang ginahimo na. Ang pagmisa sa mga Malls sa Dominggo. Ang mga opisina sa kompiniya ug mga banko nga mihangyo, ginamisahan na usab sa adlaw tingtarbaho. Ang mga ahensiya publiko nagahangyo usab nga misahan kanunay. Naa nay pipila nagahimo na ang pagmisa didto. Ang uban atol sa espesyal nga okasyon, magpamisa sa ikang lugar. Sa ato pa, nagamisa sa mga dili sagradong lugar ug atol sa dili sagradong hitabo, sama sa Araw ng Barangay.

Igo na ba ang gihisgutan sa itaas, sa pagtuman sa misyon sa parokya ug GKK? Sa atong paningkamot nga molambo ug mabag-o ang Parokya karong tuiga, unsa pay lain nga angayan gayud himoon alang sa kalamboan sa panaghiusa, pagpangilabot alang sa misyon?

Ang pagsaulog lamang sa mga Sakramento dili igo nga makabag-o sa tawo ug sa iyang kahimtang. Ang kasaysayan sa kaluwasan ug sa Simbahan, uban ni Kristo, atong Ginoo, naghatag og dalan ug kahayag niini. ISANGYAW ANG MAAYONG BALITA, PAGHINULSOL, ARIN MAHIULI SA DIOS, PINAAGI SA KASINATIAN UBAN NI KRISTO JESUS. Kining, ginatawag nga unang lakang, basin nakalimtan na?

Ug karon baya, niining modernong panahon, dunay tulo ka kinaiya ang pagasangyaw sa Maayong Balita. Kinahanglan BAG-O na – ang kaigmat, ang pamaagi, ug ang pagpadayag. Nahisentro kini sa pagsaksi sa gugma ug kalooy sa Dios sa katawhan ug kalibutan. Ang karaang paagi dili na sarang makatandog ug makausab sa kasingkaisng ug hunahuna sa mga tawo karon.

Tan-awa kuno diha sa inyong parokya kung naa ba ni? Kinsa’y nagahimo? Asa? Kinsay gisangyawan? Unsay resulta? Naapil ba ang mga bata ug batan-on?

Salamat sa Dios nga diri sa atong dapit sa Mindanao ug sa atong nasud adunay daghang lainlaing paningkamot sa pagsangyaw sa Maayong Balita. Kasagaran, mga gipasiugdahan sa mga laykong grupo, nga madasigon, malipayon, makugihon, masaksihon. Anaa ang PREX, ang CFC, ang BCBP, ang BLD, ang EV2033, ang NEO CATECHUMENATE, ang FOCOLARE, ang EL SHADDAI, ang LIGHT OF JESUS FAMILY, UBP. Ato silang ilailahon, dapiton, awhagon, suportahan, ug giyehan aron mahimong mga igpapatubo, tigpasiugda og bag-ong kaigmat sa pagmisyon sa sulod ug gawas sa Parokya.

Ang PCP II sa Pilipinas, ang “Tertio Millennio Ineunte” ni Papa San Juan Pablo II, ug ang “Evangelii Gaudium” ni Papa Francisco naghisgot kanato mahitungod sa Bag-ong Ebanghelisasyon karon. Busa, kini ang panahon ug tuig nga imantala ug isugilon pagusab kining maong bahandi nga gihuptan natong mga misyonerong sumusunod ni Kristo. Dili nato usikan ang gitaganang panahon. Paningkamotan ta sa paglakaw sa dalan, kamatuoran ug kinabuhi ni Kristo. Pinasikad sa tema ” Live Christ – Share Christ” padayon kita sa atong nobena nga karong tuiga nahisentro sa Parokya-GKK.

Ang atong mga igsoon sa Couples for Christ (CFC) nagahatag kanato ug nindot nga sumbanan – massive, rapid, ug global Evangelization! Tara na! Balikan ta ang unang lakang sa pagtukod sa Parokya ug GKK.