Mga nanay, tatay sa Home for the Aged gibisita

Ang mga Pangulo sa Katilingbanong Banay (PSKB) sa St. Joseph the Worker Parish miduaw sa Care for the Elderly Foundation, Inc. Home for the Aged sa Biao, Guinga Tugbok District niadtong Disyembre 11. Bitbit ang ilang pamaskong toiletries ug cash alang sa ilang pagkaon, gilingaw usab sila sa mga himig pamasko, sayaw, uban pang huni.

Dakung kalipay ang gibati sa mga PSKB sa ilang pagpaambit sa panahon ug paglingaw kanila.

Nagpasalamat ang founder nga si Mrs. Arobo sa hinabang nga nadawat. “Nag-awhag usab kami sa mga kaigsoonang kasigpit nga GKK sa pagduaw usab sa Care for the Elderly Foundation, Inc. Home for the Aged. Gikinahanglan nila ang atong pagtagad ug pagmahal. Ang Dios magauban unta kaninyo.”

Ang Foundation nga gipamunoan ni Mrs. Fe Bada Arobo, pribadong institusyon nga nagaatiman sa mga tigulang nga adunay Alzheimer’s disease ug kadtong di na maatiman sa mga anak. Namugna kini niadtong Disyembre 8. Sa kasamtangan, adunay 55 ka mga tigulang ang giamuma sa mga nars ug doktor. Aduna kanila nag edad ug kapin 100. Aduna sab gikan America, Alaska, Germany nga ilang giatiman tungud sa sakit nga Alzheimer’s. Ang uban mga retiradong empleyado, madre, attorney, engineer, teacher, ug uban pa. (Photo & Text by Carmen Timario)