Kapistahan, Sinulog sa Kaputian gidugok

Daghan pang muapil sunod tuig gilauman

Mabungahon, mabulukon ug malampuson.

Mao kini ang resulta sa bag-o lamang nahuman nga ika-34 nga kapistahan sa Sr. Sto. Niño Parish, Kaputian, Island Garden City of Samal, niadtong Enero 15. Sadya gayod ang maong selebrasyon inubanan sa mga parokyano ug mga nagkalaing-laing ministriya ug organisasyon sa parokya nga naningkamot aron magmalampuson ang kapistahan.

Una pa man ang kapistahan, gipahigayon ang mga aktibidades kalabot sa selebrasyon sama sa fluvial procession kon prusisyon sa dagat nga gisalmutan sa mga parokyano dala ang imahen ni Sr. Sto. Niño. Sabay sa mga lantsa, nag ampo sila. Gisundan kini sa road procession diin gituyok ang mga imahen sa Kaputian Poblacion padulong sa simbahan. Didto gibendisyonan ang mga naasoy’ng imahen.

Sa adlaw sa pista, tulo ka misa ang gipahigayon sa mismong adlaw sa kapistahan. Ang unang misa nagsugod sa alas 6 sa buntag, ikaduhang misa nagsugod alas 8:00, ug ang ikatulo nagsugod alas 10:00 sa buntag.

Si Arsobispo Romulo G. Valles, nagkanayon sa iyang wali sa ikaduhang misa, “nga angay gayod nga ang disposisyon nato sa kinabuhi anaa ang diwa sa pagkabata sama kang Sr. Sto. Niño kay susama sa usa ka bata nagalakaw kita, nagasalig sa pagpangga sa atong amahan. Bisan pa man unsa ang sitwasyon nga atong maagian, nagsalig kita nga anaa ang atong mahigugmaong amahan nga kanunay magbantay ug muatubang kanato sa kanunay.”

SINULOG 2017
Highlight sa maong selebrasyon mao ang Sinulog 2017 sa parish grounds. Adunay 4 ka delegasyon gikan sa mga GKKs sama sa Sion Distrist, Adecor Dist. Kanaan Dist. ug Poblacion Kaputian. Ika-upat na kini ka tuig nga gipahigayon sa Parokya sukad 2013 sa pagpaningkamut sa kanhing kura paroko, Fr. Rico Enriquez.

Sa ikatulong higayon, ang Adecor District lang gihapon ang kampyon. Sila nakadawat ug P 13,000, dayon gisundan sa Poblacion Kaputian (P 11,000), Sion District (P 8,000), ug Guadalupe District (P 4,000).

Ang pulong Sinulog gikan sa Cebuano adverb sulog nga nagpasabot, sama sa lihok sa tubig/balod sa dagat nga nagalihok padulong ug pabalik.

PROGRAMANG PASTORAL
Ang kasamtangang kura paroko sa Kaputian, Fr. Pepe Retorca nagkanayon sa iyang welcome message nga angay ipaambit ang talent sa tanan. Nakita sab niya ang panginahanglang pastoral sama sa dugang pang pormasyon sa parokyano aron mas mudaghan pa ang muadto ug muapil sa kalihukan sa parokya. Nainstalar sa miaging tuig, nagpangapa pa si Fr. Pepe sa iyang mga lakang. Apan tungod sa suporta sa parokyano, siya nagpasalamat kanila. “I am so thankful sa Sr. Sto. Niño because this is such a work of grace and a touch of God’s hand nga malampuson gayud ang atong kapistahan. We met all our targets exceeding our expectations because of the overwhelming response sa mga parokyano.” Dugang pa ni Fr. Retorca, ang tema karong tuiga nga kapistahan mao ang giya sa selebrasyon ug ang kapistahan mao ang ekspresyon niini. Nagtabang sab kini sa mga parokyano aron muaktibo sila nga mupartisipar sa mga kalihukan dili lang sa parokya apan sa matag GKK nila.”

Malipayon nga nanguli ang mga parokyano human magsadya sa pagsaulog sa kapistahan. Tema sa kasaulogan karong tuig mao ang “Parokya sa Sto Niño: Kausa sa Tuig sa Parokya ingon nga kahiusahan sa mga katilingban.”

Nahimong parokya niadtong Mayo 30, 1983, ang parokya adunay 34 ka GKKs sa kasamtangan. (Merry Love Asoy | SNP SoCCom)

PHOTOS: Christian Paul Oferio (PYCA), Kristina Palacio (PYCA), Eli Veloso (PYCA)