Kangitngit ug Kahayag

Ika-3 Dominggo Sulod sa Ordinaryong Panahon
Is 8:23-9:3 | Ps 27 | 1 Cor 1:10-13, 17 | Mt 4:12-23

Ang hulagway sa kangitngit ug kahayag reyalidad kini nga sination gayod sa matag tawo. Ug kini sination sa matag tawo kana tungod kay kabahin man kini sa panahon nga gitakda sa Dios alang kanato. May panahon sa kagul-anan ug panahon sa kalipay; may panahon sa pagbangutan ug panahon sa pagsayaw (Ecc. 3:4). Ug tungod kay ingon-ani man ang programa nga gihatag sa Dios sa atong kinabuhi dapat atong dawaton dili likayan. Dili dapat nga e-maximize nato ang kahayag o kalipay ug e-minimize nato ang kangitngit o kasakit diha sa atong kinabuhi.

Ang atong unang pagbasa ug atong Ebanghelyo niining Dominggoha naghisgot kini ug kangitngit ug kahayag. Si Propeta Isaias sa unang pagbasa nag-ingon; “Ang katawhan nga naglakaw sa kangitngit nakakita ug dakung kahayag. May kahayag nga misubang sa nagpuyo sa yuta sa anino sa kamatayon.” Unsa man kining kangitngit nga nasinati sa katawhan sa Israel sa panahon sa maong propeta?

Ang kangitngit mao nga gitugotan sa Ginoo nga mabuntog ang nasud sa Israel ug mahimong ulipon sa hari sa Asiria ug tungod niini ang katawhan sa Israel naglisud ug nag-antus pag-ayo.

Kini nahitabo kana tungod kay si Haring Ahaz uban sa mga tawo misalikway man sa pulong ug sa mga pahimangno sa Ginoo ngadto kanila. Gilikayan sa Hari ang pahimangno sa Ginoo kana tungod kay nagtoo siya nga ang pagtuman sa maong pahimangno maghatud kanila sa kaalautan o kapildihan. Ug sa ilang paglikay mi resulta na hinoon kini sa ilang pag-antus.

Mao nga ang hagit sa kinabuhi dili dapat likayan kundi atubangon uban sa panabang sa atong labaw nga makagagahum. Pero ang nakanindot mao nga wala matapos dinhi ang estorya kana tungod kay si propeta Isaias nagtagna nga moabot ang panahon nga modan-ag ang kahayag sa maong kangitngit nga nasinati sa maong katawhan.

Ang unang kahayag nga nasinati sa mga tawo mao ang pagkatumba sa Asiria nga miresulta kini sa pagkabuhi pag-usab sa paglaum sa mga tawo ug ang pagkalingkawas nila sa pagpas-an sa yugo sa pag-antus nga gisangon ngadto kanila sa ilang mga kaaway. Ang ikaduhang kahayag nga nasinati sa history sa maong katawhan mao ang gisaysay sa atong Ebanghelyo nga diin si Jesus mibiya sa Nazaret ug mipuyo sa Cafarnaum, ang lungsod daplin sa Lanaw sa Galilea, kasikbit sa Zabulon ug Neptali ug nagsugod sa iyang ministriya sama sa usa ka suga nga naghatag ug kahayag diha sa kangitngit.

Kining gibuhat ni Hesus nagsilbi kining katumanan sa gitagna ni propeta Isaias diha sa atong unang pagbasa kana tungod kay ang maong mga lugar nga gihisgutan mao man ang mga lugar nga nakatagamtam ug mga pag-antus. Si Jesus miabot isip kahayag; nagsangyaw sa gingharian sa Dios, nag-ayo sa mga masakiton, naghimo ug mga milagro, ug arun paghatag ug kagawasan sa tawo sa sala ug sa kamatayon.

Nakita nato sa Ebanghelyo nga gusto gayud ni Hesus nga duna siyay mamahimong kaabag sa iyang gimbuhaton. Mao nga nagtawag siya’g mamahimo niyang mga disipulo ug nakita nato nga mao gayod ni ang una nga iyang gibuhat. Gitawag niya si Pedro, si Andres, si Jaime ug si Juan ug kining maong tawag nagapadayon hangtud karun kana tungod kay buot gayud ni Hesus nga ang iyang gimbuhaton magapadayon nga mao ang paghatag ug dan-ag o kahayag diha sa mga tawo, sa mga sitwasyon o mga panghitabo nga anaa ang kangitngit. Ang panagbingkil, palabwanay o pagka-bahinbahin nga nadungog nato sa ikaduhang pagbasa panghitabo nga padayon nga atong nasinati diha sa atong palibot. Pagpabuto ug bomba diha sa lugar nga daghan ang mga tawo nga daghan ang kinabuhi nga makalas, ang pagpatay ug tawo nga mura bag sayon ra kaayo ang paghimo niini ug daghan pa.

Kini nagpahinumdum lamang kanato nga daku gayud kaayo ang gimbuhaton sa simbahan. Isip simbahan ato kining atubangon dili nato likayan kana tungod kay kung ato kining pakigbisugan uban ni Hesus sa atong taliwala maangkon gayud nato ang kadaugan ug ang kagawasan nga gitinguha sa katawhan. Hinaut pa unta… (Fr. Diony Torrentera)