Hindi lang pamparokya, pang-isports pa!

Pipila ka mga pari sa Diocese sa Davao ang nakigtigi sa dulang basketball batok sa Holy Family Selection. Ang Holy Family Selection grupo sa mga GKK Servant Leaders sa parokya sa Holy Family Parish sa Baliok, Talomo, District. Kini atol sa ika-12 kapistahan sa parokya diin nagpakita ug katakos ang matag team sa pagduwa sa basketball, sa IWHA gym, niadtong Disyembre 30.

Sa gihimong basketball, napakita sa atong kaparian sa Diocese nga dili lamang sila maayo sa pagtukod ug team sa pagpahigayon sa mga buluhaton sa parokya, apan sila pod adunay katakos sa pagdula isip usa ka kusog nga team sa mga clergy sa diocese.

Ang pagsalmot sa basketball naghatag usab ug panahon sa Davao clergy mga magkita kita gawas sa clergy meeting, aron mahatagan ug pagtagad ang pag-ehersisyo ug paglingaw- lingaw. Kini usab usa ka maayong oportunidad nga makauban nila sa pagdula ang mga GSL nga sagad ilang katambayayong sa mga buluhaton sa simbahan, hilabi na sa vocation promotion.

Kauban sa mga paring nagdula mao sila Fr. Ricky Peñalosa, Fr. Ricky Flores, Fr. Johnny Autida, Fr. Dioscoro Saniel, Fr. Rene Ribac, Fr. Raul Nieves, Fr. Allan Rodriguez, Fr. Leif Simbajon, ug Rev. Fr. Christopher Alcayde. Samtang ang mga midula sa Holy Family team mao sila Ricky Perez, Jerry Pausta, Arthur Fulgarinas, Jun Lamparas, Alvin Glimada, Joselito Balais, Larry Maybuena,Tammy Lacorte, John Flores, Jojit Badua, Ricky Bais ug Rey Abule.

Sa gihimong panagsangka, midaug ang Team sa Davao Diocesan Clery sa score nga 117 batok 108.
Si Fr. Leif Simbajon mao ang nahimong Most Valuable Player (MVP) of the game nga nakakuha ug 29 puntos.

Wala gayod napakyas ang mga nanan-aw kay nalipay gayod sila sa nasaksihang dula sa mga pari ug mga GSL. Ang nahitabong dula nagpamatod nga,“ang mga pari hindi lang pamparokya, pang-isports pa.” (Flor Arellano-Deloria | HFP SoCCom)