Hain man ang bata nga natawo?

Is. 60:1-6/ Salmo 72/ Eph 3:2, 5-6/ Mt. 2:1-12

Karong adlawa ang kataposang adlaw sa Pasko sa pagkatawo sa Ginoo ug ang unang adlaw sa Ordinaryong panahon sa liturhiyanhon nga kalendaryo. Kining pagsubay nato pinaagi sa pag-obserbar sa siklo sa espirituhanong pagkinabuhi, atong gisaulog ang mapadayunong pagpadayag sa kaluwasan nga gihimo sa Ginoo.

Sama sa mga tawong maalamon, kanunay kitang nangutana HAIN MAN? Nangutana kita matag- adlaw hain man ang panabang sa Ginoo, ang panalanging nga akong gikinahanglan, ang katumanan sa akong mga pangandoy ug kalampusan sa akong mga paningkamut. Kining maong pangutana nagtangag sa kinauyokan nga kamatuoran sa matag usa kanato nga maangkon lamang ang tinuod nga katagbawan ug kalipay sa iyang pagkaplag kanato. Ang tawong nakaplagan sa Dios makaangkon sa tinuod nga panalangin ug dili matupngan nga kalipay.

Sa pagkahimong BATA ni Hesus nga Manluluwas, gitawag kita nga mahisama kaniya. Magmasinugtanon ug magmasaligon unta kita sama sa usa ka bata. Ang masinugtanon makaangkon sa kahapsay kay ang tanan giplano man sa Ginoo. Kung subayon lamang nato ang gusto sa Dios, makab-ot nato ang kalinaw. Ang masaligon dili mabalaka ug walay kahadlok. Siya andam nga mobuhat kutob sa iyang makaya uban sa pagsalig nga ang Dios mao nay mohulip sa iyang pagkulang.

Ang Dios nga NATAWO nagpadayag sa iyang hingpit nga gugma. Iyang gipakita ang daku natong importansiya nga Siya mismo ug dili lang ang mga binuhat Niya ang iyang gipauban kanato. Siya mismo nakig-uban kanato ug miambit sa atong pagkatawo aron kita makaambit sa Iyang pagkabalaan ug pagkadios. Mhimamat unta nato Siya diha sa matag-usa – sa mga kauban nato sa panimalay, sa mga kauban nato sa trabaho, sa mga miyembro sa atong katilingban, sa atong kasilinganan ug sa atong mahimamat matag-adlaw. Siya dili na halayo kanato. Ania Siya nagpadayag pinaagi sa pag-uban kanato matag-adlaw.

Sa atong pagpangutana HAIN MAN ANG BATA NGA NATAWO ato untang mabatunan ang pagkamasinugtanon ug masaligon sa Ginoo diha sa atong pangandoy nga makaplagan kita Niya kay Siya nagpadayag ug mipuyo na uban kanato.