Ebanghelyo sa kinabuhi tubag sa langit sa luhaan nga kalibutan

Karong tuiga mao nay ika -50 ka tuig sa tinuig nga pagampo sa tibuok Simbahan alang sa kalinaw sa kalibutan, pinangulohan sa atong Santo Papa. Niining tuiga si Papa Francisco nagsentro sa iyang mensahe sa kalinaw bahin sa dili mapintas (nonviolent) nga paagi o stilo sa politika alang sa kalinaw.
(basaha ang tibuok mensahe dinhi sa DCH)

Kining maong paagi iya kini sa Ebanghelyo. Si Jesus ang nagtudlo niini ug nagkinabuhi niini. Kini ang paagi alang sa mga Kristiyanos sa pagkab-ot sa kalinaw. Mahinungdanong pahinumdum kini, ilabi na taliwala sa “bag-ong normal” karon sa politika sa kalibutan, sama diri sa atong nasud, nga karon nakigbugno sa 3 ka giyera kalaban ang illegal nga droga, kriminalidad, ug kuropsyon. Niusbaw samot ang kultura sa kamatayon.

Nahinumdum usab ako sa mensahe sa mahal nga Birheng Maria sa Fatima niadtong tuig 1917 pa, bahin sa kalinaw sa kalibutan ug paghunong sa giyera. Mga panahon kadto sa kasamok ug kagubot ug paglutos sa Simbahan.

Ang Birheng Maria sa Fatima, sa makaunom, nagpakita sa 3 ka bata – si Lucia, Jacinta, ug Francisco , dinala ang mensahe alang sa plano sa kalinaw gikan sa langit. Ang maong plano naglangkob sa 1. Pag-ampo, 2. Paghinulsol ug Pagbayad sa sala, 3. Pagtugyan sa Putling kasingkasing ni Maria.

PAGAMPO. Ang Birhen sa Fatima mismo ang naghangyo nga mag ampo sa Rosaryo matag adlaw, alang sa kalinaw sa kalibutan ug aron mahunong na ang mga gubat, mapasaylo ang mga sala ug magbag- o ang makasasala.

PAGHINULSOL UG PAGBAYAD SA SALA. Gipangayo sa Birhen sa Fatima nga ang mga tawo mohunong na sa pagpakasala nga maoy nagapadayon nga naghatag og hilabihang kasakit sa Ginoo ug sa katawhan. Sa ato pa dili igo nga ampo lamang. Gipangayo usab nga magpenintensiya alang sa kapasayloan kaugalingong mga sala ug sa ubang mga makasasala. Sa ato pa, ang tinuod nga tubag sa luhaan nga kalibutan mao ang mahigugmaong pagbalik sa Dios ug ngadto sa iyang isigkatawo, ang iyang kaigsoonan.

PAGTUGYAN SA KINABUHI NGADTO SA PUTLING KASINGKASING NI MARIA. Matud pa ni Sr. Lucia, nagpabilin siya sa kalibutan sa dugayng panahon tungod sa pagbuot sa Birhen sa Fatima nga pinaagi kaniya mokaylap ang pagtugyan sa katawhan sa tibuok kalibutan ngadto sa iyang Putling Kasingkasing. Kining maong pagtugyan sa kinabuhi ngadto sa Mahal nga Birheng Maria maoy pagpadayag sa pagtahan sa kaugalingon balik sa pagkinabuhi sa Kamatuoran, Kaangayan, ug labaw sa tanan, ang Gugma ngadto sa Dios ug sa isigkatawo.

Sa Deciembre 10, 1925, nagpakita pagusab ang Birhen sa Fatima kang Lucia didto sa Pontevedra, España diin siya nagpuyo. Niadtong tungora, gipadayag sa Birhen Maria kaniya nga sugdan ang pagpakaylap sa tibuok kalibutan ang debosyon sa 5 ka primerong sabado – ang kalawat sa paghupay sa unang sabado sa bulan. pinaagi niining debosyon masinati ang Pag-ampo, Paghinulsol, ug pagtugyan sa Putling Kasingkasing ni Maria. Matud pa, kini ang magdala sa tawo sa pagbag-o sa kinabuhi ug sa ingon magmalinawon siya sa hunahuna, pulong ug buhat. Ato kining tagaan ug dugang katin-awan sa mga mosunod nga mga artikulo.

Mapaubsanon natong patalinghugan ang tawag sa FATIMA, ang tawag sa panahon karon. Ang atong Mahal nga Inahan sa langit nagatawag kanato. Ug kini ang ginapamatngon kanato ni Santo Papa Francisco, sa unang adlaw sa bag-ong tuig, ang Sentenaryo sa Fatima.

Malinawon nga bag-ong tuig kanatong tanan alang sa malipayong tuig!