Caroling sa Holy Family Parish

Ang pagpanaygon kabahin sa pagsaulog sa Pasko sa parokya diin si Fr. Ricky Peñalosa mismo ang nanuktok sa tagbalay ug nihangyo kanila kung mahimo ba silang manaygon. Dinuyogan ug gitara, nanganta sila ug Christmas songs pahinungod sa gibisitang pamilya.

Nasorpresa ang pamilya nga giawitan kay imbes nga sila ang muhatag ug sinsilyo isip pinaskuhan, sila man hinuon ang gitunulan ug gasa nga gikan sa parokya.

Ang pinaskuhan nga giandam sa parokya gikan usab sa mga parokyano nga ilang gihalad sa Misa de Gallo. Ang mga halad sama sa bugas, biskwit, de lata, gatas, kape, asukar ug uban pa, gitigom aron madalit sa pamilyang nanginahanglan aron bisan sa kawad-on aduna silay maambitan sa ilang lamesa.

Kini nagpadayag sa gugma sa Diyos pinaagi sa mga taong nakahinumdum kanila labi na gayod niining panahon sa Pasko. Kini naghatag ug kadasig kanila aron magpadayon sa pagpanginabuhi luyo sa mga pagsulay ug kalisdanan.

Kasagaran sa mga pamilyang gipanaygonan mao ang mga tigulang nga masakiton ug katong pamilya nga nawad-an ug panginabuhian. Tungod sa gihimong pagpanaygon ni Fr. Ricky, kuyog ang mga GSL, nahimong mas makahuluganon ang diwa sa pasko alang kanila. Nagpakita kini nga bililhon ang pagtagad ug paghatag ug panahon sa mga tawong nanginahanglan hilabi na gayod ang mga masakiton.

Nanghinaot si Fr. Ricky, uban ang mga GSLs sa Holy Family Parish nga mas daghan pa ang mahatagan ug gasa sa mga musunod nga tuig. Mapasalamaton siya sa mga parokyano nga nitubag sa panawagan sa paghalad alang sa mga tawong nangihanglan.

Ang aktibidad kabahin lamang sa pagsaulog sa ika-dose ka tuig sa Parokya.