Bulahan ka nga masaligon sa Dios

Ikaupat nga Domingo sa Ordinaryong Panahon
Zep. 2:3; 3:12-13/ Salmo 146:6-10/ 1 Cor. 1:26-31/ Mt. 5:1-12

Kasagaran dunay moingon kanato nga bulahan ta kung nagmalipayon kita ug gibusog kita o bulahan ta kung gitahod ug nasinati nato ang kalinaw. Apan nganu kaha nga sa Ebanghelyo karon si Hesus miingon man hinuon nga bulahan ang nagsubo, ang gigutom u gang gilutos? Naunsa mang hitaboa nga kini sila nabulahan?

Ang atong Ginoo dili malipay nga magsud-ong sa mga kabus, sa gilutos sa mga gigutom ug sa mga walay kalinaw. Walay tuyo ang Dios nga kita mag-antus ug maglisud-lisud. Mao man gani nga Siya mipuyo uban kanato aron kita maluwas.

Apan diha sa mga kasinatian sa kalisud ug kapait, sa kagutom ug sa pagkalinutos, kita makasangpit ug makasalig sa Dios. Diha lamang sa mga kasinatian nga wala kitay gisaligan kondili ang Dios lamang kita mabulahan. Sa atong pagsalig dili sa mga butang o salapi nga atong naangkon, sa kabuhong ug posisyon nga atong nahimutangan ug sa gahum ug kahayahay nga atong nakab-ot, dinha atong maangkon ang kabulahanan.

Ang mga tawong gilutos, naglisud, ug gigutom maoy masaligon sa Dios kay wala man silay kapadulngan, mao ang mga bulahan. Sila ang giingon sa unang pagbasa nga mga midangop sa Ginoo. Sila ang misalign nga walay makahulga kanila. Sila ang mga gihisgutan sa ikaduhang pagbasa nga mga dili importante nga gipili sa Dios aron ipakita ang iyang gahum. Sa ilang kahuyang anaa ang gahum sa Ginoo.

Tinuod gayod nga kung mosalig kita dili sa mga butang o posisyon nga lumalabay lamang niining kalibutana, kondili sa Dios nga magpabilin kanunay, bulahan gayod kita. Bulahan kita nga mitahan sa atong kaugalingon ug misalig dili mga nagkausab-usab ug mahanaw nga mga binuhat ug material nga kabtangan kondili sa mithi sa pagsalig sa Dios ug paglihok alang sa kalinaw nga maoy magpabilin sa kahangturan.