B’laan sa Matanao nalipay sa pagbisita sa pari

Nahuman na gayud ang kapaskuhan niadtong imaging semana, apan tuguti ko sa pagpaambit sa among kasinatian kauban ang kaigsoonang B’laan sa parokya sa Bangkal, Matanao, Davao del Sur sa dihang mibisita ang ilang kura paroko nga si Fr. Allan Joie T. Nuñez, uban ang 5 ka boluntaryo gikan sa Parish Social Action Ministry (PSAM).

Atol sa kapistahan sa Sagrada Familia gibiyahe nila ang Sitio Datal Fitak sa Barangay Colonsabac nga maoy kinatumyang Sitio nga sakop sa Matanao. Silingang lungsod niini mao ang Munisipyo sa Columbio, Sultan Kudarat ug Munisipyo sa Tampakan, South Cotabato.

Kapin usa ka oras ang byahe gikan sa parokya padulong sa maong Sitio sakay sa mga motorsiklo dala ang mga pahalipay nga mga de lata, noodles ug pinutos nga bugas gikan usab sa mga parokyano.

Sa ilang pag-abot, gisugat sila sa mga lumolupyo sa Sitio ilabina sa mga kabataan dala ang panghinaot nga makahatag sila ug kalipay niining sa pasko atol sa kapistahan sa Sagrada Familia.

Naminaw ang mga lumad sa pagpaambit ni Fr. Allan kung unsa kaimportante ang gugma ug panaghiusa diha sa pamilya. Panghinaot usab niya nga matag miyembro sa pamilya mahisama sa pamilya ni Jose, Maria ug Jesus. Human sa misa, giapud-apod sa mga pamilya ang dalang pahalipay.

Sumala sa tribal leader sa maong Sitio nga si Datu Serhing Samling, “kining among nadawat karon, mao ang among lutuon atol sa pagsaulog sa Bag-ong Tuig.” Dili masukod ang ilang kalipay sa ilang pagpamauli sa ilang panimalay. (Jonifer Tampus Banggaan | St. Michael Matanao Parish)