Birhen sa Fatima magpahinumdum sa mensahe sa kalinaw

Alang sa sentenenario sa Fatima, ang santuario sa Fatima sa Portugal, nagpadala og imahen sa Birhen sa Fatima, aron moduaw sa mga lain-laing dapit sa nasud. Gipahigayon kini alang kanato sa World Apostolate of Fatima (WAF) – Philippines. Mapasalamaton kita kanila niining maong panawduaw.

Mahinuduman nato nga kaniadto pa, aduna nay susamang panawduaw nga gipahigayon sa laing grupo. Kining maong panawduaw karon gipadalhan gayud og imahen sa santuario sa Portugal diin nahitabo ang pagpakita sa Mahal nga Birheng Maria, usa ka gatos na ka tuig ang milabay.

Ang panawduaw maoy usa sa mga kalihokan sa Simbahang Katoliko aron sa pagsaulog sa maong dakong hitabo sa pagbisita sa Mahal nga Inahan ni Jesus gikan sa lanagit, ngadto sa tulo ka mga bata. Usa usab kini ka paagi nga mahinumduman tanan ang iyang gidala ug gipahayag nga mahinungdanong pagdapit ug panaad alang sa kalinaw sa kalibutan ug pagtapos sa giyera.

Human sa paglunsad sa selebrasyon sa sentenenaryo dinhi sa Pilipinas niadtong Enero 29, 2017 didto sa National Shrine sa Birhen sa Fatima, sa Valenzuela Bulacan, magsugod ang panawduaw dinhi sa Mindanaw, dinhi mismo sa atong DADITAMA. Sa Pebrero 4, 2017 moabot sa Davao City hangtud sa Pebrero 8. Mopadayon ang panawduaw padulong sa diyosesis sa Digos sa Pebrerop 8 hangtud Pebrero 12. Didto sunod sa diyosesis sa Tagum Pebrero 12-15. Ug magtapos didto sa Diyosesis sa Mati sa Pebrero 15-18, 2017. Pagkatapos sa diyosesis sa Mati mopadayon sa laing rehiyon didto sa Caraga.

Sa iyang pagbisita, siyempre mahinungdanon ug mapuslanon nga magtimbaya kita ug magpasidungog kang Maria, Birhen Santo Rosaryo. Bililhon nga makita siya, mahikap aron mapadyag ang pagtamod ug pagmahal ug atong mga mga pangamuyo usab. Gahinan gayod nato siya’g panahon.

Gawas niini, labi pang mahinungdanon nga mamati pagusab sa iyang MENSAHE UG PANAAD, aron hugot nga MOTOO, MOSALIG UG MOSUNOD sa iyang gipangayo. Busa, kinahanglan gayud ang paghilom ug pagpamati sa mga pamahayag.

Dali ra kayo ang iyang panawduaw uban kanato 3-4 ka adlaw lamang. Maingon nato nga pasiuna lamang kini sa tibuok tuig nga pagsaulog ug balik – tuman sa misyon nga gisangon niya sa tibuok Simbahan.

Niining Tuig sa Parokya karong 2017, atong gitinguha ang pagpalambo pa gayud sa tininuod nga pagsaksi sa pagtoo sa Parokya ngadto sa kalibutan. Dako kaayo ang ikatabang sa pagsugod o pagbuhi pagusab sa debosyon ug misyon sa Putling Kasingkasing ni Maria. Lakip niini ang adlaw-adlaw nga pagrosaryo ug ang balansayon sa 5 ka primerong sabado sa bulan.

Hinaot unta nga magbunga og daghang spiritohanong kaayuhan king panawduaw alang sa tanan nga nanginahanglan, ilabi na sila nga nanginahanglan kaayo sa Kalooy sa Dios.