Bible Apostolate naglatid og mga kalihokan alang sa NBW

Bible Apostolate naglatid og mga kalihokan alang sa NBW

Pagasugdan ang pagobserbar sa National Bible Week (NBW), Enero 23-29, 2017 sa diyosesis sa Mati pinaagi sa pagpahigayon og sinemanang “Bible Quiz on the Air” matag mierkoles, alas 4:00 sa hapon sugod sa bulan sa Enero sa tulumanon sa Bible Apostolate (BA) sa DXHM-AM.

Sumala ni BA diocesan coordinator Sr. Belen R. Suemith, LGC, nagtigom ang mga BA leaders ug radio team alang sa paglatid sa mga kalihokan alang sa NBW.

Una, ang pag-apod apod sa mga posters ug mga bibliya sa mga parokya; sunod ang pag-integrate sa NBW theme sa liturhiya; pagpahigayon og creative presentations sama sa pagpaskil og mga berso sa Bibliya sa simbahan ug school bulletin boards, pagproklamar sa pulong sa Diyos atubangan sa katawhan sa bisan asang dapit bisan sa panimalay; pag-organisa ug  sports events, motorcade, rally, konsiyerto,  o mga kompetisyon sa musika –sa  awit o sayaw;  Bible reading marathon; ug Bible reading panahon sa flag ceremony.

Ang tema karong tuiga nga gipagawas sa  Philippine Bible Society mao, “Biblia ang Paglaom sa Paglambo sa Katilingban” [’The Bible: Hope for the Community’s Progress’].  Gibase usab kini sa Salmo 133:1 ug Roma 12:4-5, gikan sa New American Bible Revised Edition (NABRE) nga sa Ingles, mabasa kini: “How good and how pleasant it is, when brothers dwell together as one” (Ps. 133:1); “We have many parts in the one body, and all these parts have different functions.  In the same way, though we are many, we are one body in union with Christ..” (Rom. 12:4-5).

Gipanghinaut nga mahimong makahuluganon ug nga makaangkon og dakong partisipasyon ang pagsaulog sa NBW karong tuiga, nga tapuson sa National Bible Sunday sa Enero 29, 2017. Ang tinuig nga NBW ang kanhi gimandoan sa Presidential Proclamations 2242, 44, ug 1067 aron mas makaamgo ang mga lungsuranon kabahin sa importansiya sa Bibliya. Dungan sa Catolikong pagtuo, gisunod usab kini sa ubang mga Kristiyanong relihiyon sa nasud.  Kahinumduman nga sa miaging tuig, gigamit ang tema nga: “Pulong sa Diyos: Paglaum sa Pamilya, Kusug sa Nasud,” pinasikad sa Salmo 33:12 ug Buhat 16:31.

Banaybanay Farmer midaog sa Most Outstanding Rice Farmer Nat’l Award

Usa ka babayeng mag-uuma gikan sa Banaybanay, Davao Oriental, ang nakadawat sa nasudnong premyo sa Most Outstanding Rice Farmer. Nadawat ni Genevieve Y. Madelo ang maong award sa miaging bulan sa Disyembre 2016 sa 46th National Gawad Saka Awarding Ceremony sa Philippine International Convention Center sa Manila.

Si Madelo maoy napili sa unom ka mga national finalist alang sa Gawad Saka Award gikan sa Davao Oriental.

Ang Gawad Saka maoy usa ka proyekto sa Dept. of Agriculture nga nagtumong sa pagtabang ug pagganti sa mga malungtarong buhat sa agrikultura, aron mousbaw ang maong sektor sa kalamboan sa nasud.

Si Madelo, nga inahan sa upat ka anak ug kanhi Overseas Filipino Worker (OFW), miingon nga dako gayud ang nahimo sa ayuda gikan sa panggamhanan (probinsiyal ug municipal) alang sa iyang kalampusan sa pagsaka.  Matud pa niya, nakatabang gayud ang mga “planting materials and fertilizers, as well as trainings and technical support that helped me in my venture and boosted my knowledge in terms of farming.”

Nagsugod si Madelo sa iyang pagsaka tuig 2001 pinaagi sa pagpalit og yuta gikan sa kuwarta nga iyang nalikom sa gawas sa nasud, ug sa hinayhinay napadak-an kini ngadto sa 12 ka ektarya, kon diin gibansay niya ang “diversified and organic farming.” Misaka usab ang produksyon gikan sa 4 metric tons ngadto sa 7.7 metric tons, ingon man ang iyang kita. Dako usab ang garbo nila Davao Or. Gov. Nelson Dayanghirang, Banaybanay Mayor Adalia Tambuang, ug PAGRI head Rotchie Ravelo sa kadaugan ni Madelo, kinsa usab ilang giubanan sa Manila alang sa naasoy’ng award.  Ang nag-inusarang nat’l award una nang malaumong nahisgutan ni Ms. Mercy Quiamco sa Davor Provincial Agriculture Office nga dako ang posibilidad nga makapasar sa validation.