Bata nga Misyonero

Is. 9:1-6/ Ps. 97:1-6/ Eph. 1:3-6, 15-18/ Mt. 18:1-5, 10

“Sa mga mata sa usa ka bata anaa ang kalipay, anaa ang katawa.” Kini ang hubad sa usa ka inengles nga kanta nga naghulagwas sa kasinatian sa pagka-inosente sa usa ka bata.

Niining kapistahan sa Balaan nga Bata gipahimangnuan kita sa mga pagbasa sa makaluwas nga kinaiya sa usa ka bata. Unsay may pipila ka nindot nga huptan nga batasan sa usa ka bata?

Una, anaa sa usa ka bata ang pagkadali matudloan. Motuo ug maosalig dayon ang usa ka bata. Mao gani nga bisag dili nila kaila mopahiyom gayod sila, mo apir pa jud ug mo alayn ang kamot kay wala silay pili nga motagad. Makasundog ug makaawat sila sa unsay makita nila. Kita kaha, andam ba kita nga matudloan sa mga pulong sa Dios bisan sa atong taas nga nga kasinatian? Andam ba kita nga makakat-on gikan sa uban?

Ikaduha, ang usa ka bata dali lang mahibulong. Ang usa ka bata dali nga matingala ug malipay sa iyang masinati o makita o madawat nga magdala kaniya sa pagpasalamat. Tungod kay alang kaniya kasagaran bag-o ang kasinatian, sayon kaniya ang pagdawat ug pagpasalamat. Makita niya ang positibo kaysa mga negatibo nga mga bayas sa nangagi. Presko ug bag-o gayod alang kaniya ang halos tanan niyang kasinatian. Kita kaha nabati ba nato ang kabag-ohan nga gasa matag adlaw? Natingala ba kita ug nagpasalamat sa bisan yano ug simple lamang nga madawat ug masinati?

Ug ikatulo, dali lamang makapasaylo ug makig-uli ang usa ka bata. Bisan mag-ilog ug mag-away usahay ang mga bata sa dulaan o pagkaon, taud-taod lamang atong makita nga nagkauban na usab sila sa pagdula ug paglingaw. Dili sila magdumot sa usa’g usa. Kita kaha, sama ba kita kanila nga makapasaylo ug andam makig-uli? Makatugot ba kita nga human sa kasuko ug panagbingkil modawat na kita sa pagkulang ug mosabot sa matag-usa?

Motubo man kita sa panglawas ug kaalam sama sa batang Hesus, hinaut nga mahuptan nato ang maayo nga kinaiya sa pagkabata. Magpabilin kitang matudloan, mahibulong ug mapasayluon.