Bag-ong mga opisyal sa ARDM napili

Bag-ong mga opisyal sa ARDM napili

Nagtigom ang Association of Religious in the Diocese of Mati (ARDM) sa miaging bulan human sa panagtigom sa Pasko sa kaparian ug diocesan clergy sa diyosesis sa Mati aron mag-ila-ila ug aron pilion usab ang mamahimong mga bag-ong ARDM officers alang sa tuig 2017-2018.

Nag-preside si outgoing president Fr. Randy G. Diamante, SDV, ug mao kini ang resulta sa botohan: President – Sr. Florita L. Galido, MIC; Vice Pres.- Fr. Antonio D. Nombrefia, OSA; Secretary- Sr. Rosalinda B. Singo, CM; Asst. Sec.- Sr. Ma. Evangeline A. Madayag, OSB; Treasurer- Fr. Diamante, SDV; Auditor- Sr. Belen R. Suemith, LGC; P.R.O.- Sr. Teresita P. Asares, OSU.

Nanumpa ang mga bag-ong ARDM officers atubangan ni Apostolic Administrator Fr. Edito S. Baño, ug gitakda ang unang panagtigom ug “turn-over of responsibilities” karong adlawa, Enero 8 sa Immaculate Heart of Mary Academy (IHMA), kon asa nag-alagad si Sr. Florita isip campus minister sulod sa duha ka tuig.

Matud niya, ang ilang agenda mao ang pagplano sa mga kalihokan alang sa tuig, pinasikad usab sa kasamtamang tema sa simbahan nga mao ang “Parish as a Communion of Communities.”

Sa ilahang election of officers, si Sr. Florita unang mipadayag  sa iyang pagduha-duha sa nominasyon kaniya, apan gipasalig sa pundok ang ilang pagsuporta alang kang kinsa man nga mapili nga pangulo. Sa iyang pagdaog, giduot niya ang iyang dakong pagsalig sa Diyos, “with mixed feelings, I cannot but trust in God’s divine accompaniment in view of my limitations, and just do what I can do with my  co-officers and God.  I am grateful for the trust and belief that they have chosen me as their leader.  Please pray for me.”

Sa laing bahin, mipadayag usab si Fr. Baño sa iyang kalipay sa presensiya sa ARDM, ug gibatbat ang pipila ka pulong kalabot sa iyang mga “expectations on how to collaborate as religious communities in the diocese.”

Mga parokyano gipasidunggan

Ang ika-32 nga anibersaryo sa San Nicolas de Tolentino Parish nga gitawag og ‘Parish Day’ gisaulog di pa lamang dugay sa Cathedral sa siyudad sa Mati subay sa tema: “Ang Panaghiusa sa Gasa sa Dios diha sa Gagmay’ng Kristohanong Katilingban (GKK).”

Ang mga lideres ug mga miyembro sa mga GKK nagsugod sa kasaulogan sa Eukaristiya nga gipangunahan sa Kura Paroko ug Apostolic Administrator Msgr. Edito “Ed” S. Baño, kinsa nagpasalamat sa Diyos sa daghang mga bendisyon o panalangin nga nadawat sa tanang adlaw sa tuig pinaagi sa pagpangama ni Señor San Nicolas de Tolentino.

Misunod ang usa ka parada human sa Santos nga Misa, diin nagpasundayag ang banda sa IHMA nga nag-una sa pagmartsa gikan sa Cathedral paingon sa Provincial Capitol Covered Court sa Capitol Hill, Mati City.

Nasaksihan usab ang managlahing mga aktibidad sa musika, sports ug parlor games nga giandam sa unom ka mga distrito sa parokya.

Human sa “fellowship lunch,” gilingaw ang tanan pinaagi sa usa ka ispisyal nga programa nga giprisintar sa mga apostolates and movements, nga gi-highlight sa mini-concert sa parish staff pinangunahan ni Yugyugan King – Fr. Ed.

Ang pinal nga parte mao ang pag-award og mga premyo sa mga mananaog sa mga dula ug sa “booth contest.” Gihatagan sab og “Certificates of Participation and Appreciation” ang matag distrito isip pasalamat sa suporta diha sa parokya.

Ang Distrito 3, 4 ug 6 ang nakadawat og premyong cash isip mananaug nga gihatag pinaagi nila parochial vicar Fr. Elezer Pagkilatan, DCM, ug Fr. Baño.

Gipadayag sa mga pari nga ang tibuok adlaw nga kalihokan maoy pinakahaum nga pagpadayag sa pasalamat sa mga lideres ug miyembro sa GKKs isip mga kauban sa pari ug relihiyoso sa pagpalapnag sa gugma sa Diyos sa 102 niini ka mga GKK sa parokya.