Ang Diyos anaa sa atong kapobrehon

“Nindot nga fiesta, pinoy na pinoy, ato gyud ni!”

Kini ang pambungat nga pulong ni Yanong Muloy human sa iyang wali atol sa ika-34 nga kapistahan sa Sto. Niño Parish, Kaputian, Island Garden City of Samal niadtong Enero 15. Iya sab gipaambit ang kaanindot sa kasaulogan hilabi na sa Davao sa Shrine of the Infant Jesus of Prague diin sya ang mag misa sa samang adlaw, ug sa Sinulog sa Cebu.

Gilunsad usab sa maong higayon ang “Tuig sa Parokya” didto. Matud niya nga kini kabahin sa “ikalima nga tuig sa nine-year preparation sukad nagsugod ang pagtoo nga kristiyanismo sa Pilipinas.”

Dugang pa niya nga tungod kay naandan naman nato dinhi sa Arkidayosis sa Dabaw ang kinabuhi sa GKK, kining tema karon sa Year of the Parish (Communion of Communities), “may dating kanato labi na dinhi sa 34 ka GKKs nga nahisakop sa Parokya… ang pamilya kahiusahan gayud sa katilingban, busa atong palakpakan ang GKK.”

“God took our form. Muduol kita sa Eyukaristiya, ang atong paghandum sa kamatayon sa atong Ginoo.” Ang debosyon nagpahinumdum kanato aron malig-on ang pagtoo nga ang Diyos nagpangga kanato. Gikan sa baho nga pasungan, gipasabot ni Yanong Muloy, nga siya nagpakatawo ug nakig-uban nato. “Gamhanan kining bataa! Mubalik kita kanunay dinhi sa Eyukaristiya, muingon kita pagka anindot nay timaan. Ang Manluluwas nakit-an nako ang Himaya!”

Ang Diyos kuno, andam muadto diin kita kinapobrehan, way nahut, tungod kay pinangga kita niya. Ang Ginoo miadto sa pinakangitngit, walay dili tagdun. Ang Diyos musandurot uban kanato. Wala mulikay, misugod isip bata uban kanato,sama kanato, gawa sa usa ka butang – ang pagsupak sa Amahan.

Human sa Misa, midiretso na si Yanong Muloy sa Matina Shrine alang sa misa sa alas 12. Pit Senyor!