4 ka Layko misyonaryo gipadala

Malampusong gipadala ang upat ka mga layko nga mga misyonaryo nga maoy motabang sa pagpabuhi pag-usab sa mga Gagmay’ng Kristohanong Katilingban alang sa tuig sa parokya, sa 2017.

Gisaksihan sa mga parokyano sa Santo Niño, Panabo ang pormal nga sending forth sa upat ka mga misyonaryong mga layko kagahapon sa hapon sulod sa usa ka misa nga gipangulohan ni Tagum Diocese Bishop Wilfredo Manlapaz, Jr.

Malampusong midawat sa ilang misyon ang bag-ong mga misyonaryong layko nga sila si Lanie Maymanan, nga taga Dabaw, Cynthia Martal nga taga Quirino Province sa Luzon, Jasper Purazo, taga Dayosis sa Marbel, ug Nikki Largoza nga taga Dayosis sa Cubao.

Sa iyang homiliya, namahayag si Bishop Manlapaz, nga isip mga binunyagan, ug sakop sa simbahan, dili lamang kay siya ang nagpadala sa upat ka mga misyonaryo apan ang tibuok simbahan mao ang nagpadala kanila.

Gipadayag usab ni Bishop Manlapaz ang iyang kalipay nga adunay mga layko kinsa sama sa mga apostoles motabang sa pagsangyaw sa maayong balita nga ang Diyos nahigugma kanatong tanan.

Sa atubangan ni Bishop Manlapaz, tagsa-tagsa sa mga kandidato ang miluhod atubangan sa altar aron nga ipadayag ang ilang kinasingkasing nga pagdawat sa ilang bokasyon nga pagka misyonaryo nga layko. Tagsa-tagsa usab nilang gidawat ang Bibliya, ang krusipiho, ug gikwintas ang kahoy nga krus isip timaan sa ilang pagka misyonaryo.

Sila si Lanie ug Cynthia ipadala ngadto sa Polilan Malolos, Bulacan samtang sila si Jasper ug Nikki ngadto sa Ormoc City sa Dayosis sa Palo, Leyte.

KAMPANYA DUGANG LAYKONG MISYONARYO

Nagkinahanglan karon ug dugang mga layko nga misyonaryo ang pipila ka mga simbahan sa Pilipinas.

Gipadayag ni Jing Saniel, ang directress sa Philippine Catholic Lay Mission kon (PCLM) nga ubay-ubay sa mga simbahan sa nasud ang nagpadangat sa ilang pagpangayo ug tabang alang sa pagpalambo sa mga Gagmay’ng Kristohanong Katilingban (GKK).

Sa tibuok Pilipinas, midugang si Saniel nga nakaserbisyo na ang PCLM ug 20 ka mga dayosises ug nakapadala na ug 200 ka mga lay missionaries sulod sa hapit 40 ka tuig.

Natukod ang PCLM tuig 1977 isip usa ka programa sa Maryknoll Missionaries sa Tagum mission area sa tuyo nga tabangan ang kaparian sa pagtukod ug mga katilingban kon mga GKK.

Nagpadala usab ug mga misyonaryong layko ang mga Maryknoll ngadto sa ilang mga mission areas sa gawas sa nasud sama sa Hawaii, Africa, South America, Myanmar, ug Thailand.

Sa pagkakaron, midugang si Saniel nga aduna pay mga layko nga misyonaryo nga gipadala sa maong mga dapit ug lakip na unya ang Taiwan ug sa nasud Japan.

Gilantaw nga labing makahuluganon ang papel sa mga layko sunod tuig nga gideklara nga tuig sa Parokya isip Kahiusahan sa mga Katilingban sa tema nga nagtumong sa pagmugna, pagpalahutay ug pagpalig-on sa mga GKK ilabi na kabahin sa kahiusahan, pagkahilambigit ug misyon.

Busa padayon nga naga-kampanya ang PCLM alang dugang mga layko nga misyonaryo nga mamahimong ipadala ngadto sa nagkalain-laing mga dayosesis sa Pilipinas ug gawas sa nasud.