2nd ug 3rd placer sa Belen Contest, gibisita sa DXGN

Gibisita ni Fr. Ritsche J. Gamaya, ang director sa Archdiocesan Commission on Social Communications ang Putli nga Kasingkasing ni Maria sa Wines nga sakop sa San Pedro Calungsod-Quasi Parish panahon sa Kasaulogan sa Pulong (KSP) aron itunol ang premyo isip 2nd placer sa Best Belen Contest sa DXGN nga gisalmutan sa GKKs sa Arkidayosis sa Davao.

Ang Belen gama sa recyclable ug indigenous materials nga makita sa palibot sama sa bagakay, bunot sa lubi, kugon, dahon sa marang, ug tela nga retaso.

Matud pa ni Joy Dianggo, Pangulo sa Panudlo, nagtinabangay ang katilingban sa pagbuhat sa Belen kauban ang mga aktibong batan-on. “Giyahan lang sila aron sila makiglambigit sa kalihukan sa katilingban.”

Dugang ni Ted Tejero nga na-ingganyo sila sa pagbuhat og Belen human nabasa sa Davao Catholic Herald ug nagpadala og sulat-pastoral sa mga PSK si Arsobispo Romulo G. Valles aron sa pagpahibalo ug pag-awhag sa tanang pangulo ug miyembro, nga tagaan og pagtagad ang pagpanindot sa Belen sa kapilya ug matag panimalay.

Nalipay ang katilingban sa sorpresang pag-anunsiyo ni Fr.Ritsche nga sila nakadaug kay nagtuo ang tanan nga “judging” pa kini. Gihatag ang “grocery items” ug “cash” isip premyo panahon sa KSP. Giambitan ang mga pagkaon nga gi-andam sa GKK Servant Leaders pagkahuman sa KSP. (Lorelyn Lahoylahoy | Erf Louie Cañamo)