Unsa man ang diwa sa Adbiento alang sa batan-on?

Ang DC Herald nangutana sa pipila ka batan-on kung unsay unang musulod sa ilang huna-huna matag dungog nila sa pulong, “Adbiento.” Mao kini ang pipila sa mga tubag nga among nakalap.

“Religion” – Jana, Puan, Davao City
“Adventure” – Brandon, Lanang
“Preparation of the coming of the Christ” – Jade, Ma-a
“Celebration towards Christ’s birth” – Koyo, Mintal
“Something special” – Glen, Mintal
“Joyful” – Sheena, Ulas
“Coming of Christ” – Angelique, Matina

Magkalahi ang pagsabot apan unsa man g’yud diay ang Adbiento alang sa mga batan-on karon? Ania ang among mass communication interns aron maghatag sa ilang panlantaw.

DIWA SA ADBIENTO
Ni Nikki Leiza P. Dacalos
HCDC intern

Gadgets, internet gaming, malling.
Kini ang kasagarang kalingawan sa mga kabatan-onan nga sama nako karon.
Panagsa na lamang ko makakita’g mga batan-o nga aktibo sa simbahan, ilabina sa mga importanteng adlaw niini.
Kon aduna man, pipila na lamang ang nagpakabana.
Usa sa mga importanteng panghitabo sa simbahan mao ang Adbiento.
Kanunay nakong madunggan ang adbiento tungod kini timail-han nga haduol na ang ginahulat nakong Pasko, ang kapanganakan ni Hesus.
Unsa ba gayud kaha kining adbiento alang kanako?
Tungod sa akong paghinam-hinam alang sa moabotay nga pasko, panagsa na lamang nako mahatagan og bili ang adbiento. Mas mauna pa ang mga pagpamalit og mga regalo, pag-apil ug Christmas parties, pagpalit og dekorasyon, ug pag huna2 sa lamiang pagkaon nga p’wedeng ihanda sa Noche Buena.

Wala kini gibawal sa Simbahan, kay tungod niini mapakita pud kong unsa ka espesyal isip Pilipino ang Pasko.
Apan nawala sa huna-huna nako nga kini usa ka importanteng preparasyon alang sa pag-abot ni Hesus; nga mas kinahanglan nakong mangandam sa espiritwal nga aspeto, tungod kay muabot na gayod ang akong Manluluwas.
Unahon diay nako ang pagpalambo sa akong espiritwal nga kinabuhi, gawas sa mga materyal nga butang nga akong iandam.

Mag ampo, maghinulsol, mag apil ug recollection sa upat ka Dominggo una ang Pasko -mao na ang diwa sa Adbiento.

MAGLIPAY
Ni Carisse Danielle Malubay
HCDC intern

Panahon na usab sa adbiento diin kita magsaulog ug magpaabot sa atong manunubos nga si Hesu Kristo. Lakip sa pagsaulog mao ang panahon sa pag-ampo og paghinulsol diha sa atong amahan.

Usa ka espesyal nga panahon ang adbiento alang sa mga kristiyano kay kini mao ang panahon kung asa kita malipayong mangandam og magpaabot alang sa kapaskuhan. Kada tuig kong nasinati kining mga buluhaton. Kami sa akong pamilya nagasimba kada dominggo alang sa pagsaulog sa maong panahon sa Adbiyento lakip na pud niini ang pagpangayo’g kapasayloan og ang paghinulsul sa mga sala nga nahimo sa maong katuigan.

Ang pagbutang og mga dekorasyon sa panimalay usa usab sa among tradisyon kada muabot ang kapaskuhan. Kini nagasimbolo kanato nga kita nagasaulog sa panahon sa pag-abot sa atong amahan nga si Hesus.

Maglipay kita sa pagsaulog sa panahon sa adbiyento. Mahimong aktibo sa mga aktibidad sa simbahan sa panahon sa adbiento sama sa recollection, magsimba ug magpasalamat sa tuig nga mutak-op na ug sa bag-ong tuig nga muabot pa.