Tuig sa Parokya (Part 5)

MGA PARI NGA MAAYONG MAGBALANTAY

Dako kaayo ang papel ug kaakuhan sa mga Pari sa pag-umol ug pagmatuto ug pagbag-o sa parokya aron matuman niya ang iyang kaakuhan alang sa panaghiusa, pagsalmot, ug misyon. Matud pa sa PCP II niadtong 1991, sa kulturang Pilipinhon, ang pagpangulo sa mga Pari ug Obispo anaay dako kaayong bahin sa paglambo ug pagbag-o sa Simbahan ug iyang epekto sa sosyodad. Busa kinahanglan nato ug mga ministro nga maoy mangusog sa pagpahigayon sa pagsangyaw sa Ebanghelyo sa umaabot nga mga katuigan. (PCP II, 507)

Dunay panultihon sa Latin “Sentire Cum Ecclesia” — mobati, molakaw, nahiusa uban sa Simbahan. Ipadayag kini sa pari pinaagi sa iyang pagtahod ug pagsunod sa Santo Papa ug sa Obispo. Makamao siya mamati, modawat ug makig-unong kaniya. Tahuron sa Pari ang mga pagtulun-an ug pamalaudnon sa Simbahan diha sa iyang pagtuman sa ministriya sa pagkapari. Ang maong kahiusahan maoy gipangamuyo ni Jesus sa iyang Amahan. Mahiusa unta sila sama nga ikaw ug ako usa ra… (Juan 17:21)

Kini ang angayang makita sa mga parokyano sa ilang mga Pari — nahiusa sila ug maunungon sa Ginoo ug sa iyang mga kaigsoonang alagad sa Simbahan — ilang isigkapari ug ang Obispo. Sa ingon, mas katoohan ang mga Pari sa ilang pagpangalagad.

“Ang mga pari nga nagkahiusa, maampoon, ug maalagaron maoy magmalipayon sa pagkapari.”

Kini ang klase sa pari nga makadani ug makadasig ug laing bokasyon gikan sa mga kabatan-onan karon. Ug ikalipay ug ikadasig gayud sa mga parokyano ang maong pagsaksi sa kahiusahan.

SAULOGON NATO ANG BIRHEN SA FATIMA

Karong 2017 mao ang ika-100 nga kasumaran sa pagpakita sa Mahal nga Birheng Maria ngadto sa tulo ka bata – si Lucia, si Francisco ug si Jacinta, didto sa Fatima Portugal, niadtong Mayo-Oktobre 1917. Panahon kadto nga daghang mga tawo nga nagsalikway sa Ginoo ug mibiya sa Simbahan. Ang Birhen sa Fatima, mihangyo sa iyang mga anak nga mobalik sa Ginoong Jesus pinaagi sa tulo ka paagi – pag-ampo, reparasyon, ug pagbag-o sa kinabuhi.

Ang mga kaobispohan sa Pilipinas (CBCP) nag-awhag ug nagdasig kanatong tanan nga iapil kining tulo ka paagi, sa atong selebrasyon sa tuig sa parokya. Karong tuiga balikan nato’g pamati ang sugilanon sa pagpakita sa Birheng sa Fatima kaniadto, patalinghugan pag-usab ang iyang mga mensahe, ang iyang mga gipangayo sa mga tawo.

Ang World Apostolate of Fatima dinhi sa atong diyosesis maoy motabang nato sa pagpahigayon sa pagsaulog sa sentenaryo sa Fatima. Gihangyo ko ang tanang parokya nga makugihon nga mosalmot sa mga isugyot unya nga mga kalihokan.

Ang atong Mahal nga Birhen sa Fatima magauban unta kanato pinaagi sa iyang mga pangamuyo niining tuig sa iyang sentenaryo ug sa atong Tuig sa Parokya. Ang Ginoong Dios manalangin unta kanatong tanan.