Mga batang may kanser gipahalipayan

Niadtong Nobyembre 24, usa ka pondok sa mga estudyante sa Ateneo de Davao Grade School ang nibista sa House of Hope nga nahimutang sa Southern Philippine Medical Center Compound.

Pinuy- anan kini sa mga batang adunay kanser.

Kauban sa ilang mga ginikanan o paryente nga nag-atiman kanila, gitugutan silang mupuyo nga libre sa maong panimalay samtang gapatambal sa SPMC, aron malikayan ang kalisod sa biyahe sa ilang nagkalahi-lahing probinsya.

Ang nahisgutang aktibidad, gihimo sa tulunghaan aron mahatagan ang mga tinun-an ug konkretong oportunidad nga makasinati sa kahimtang sa mga batang naay kanser. Atol sa maong pagbisita, nangandam ang grupo ug simpleng programa agi’g paglingaw sa mga pasyente. Adunay nakig-istorya sa mga pasyente ug ang uban nakigdula sa mga bata. Nag- andam usab sila ug gasa sama sa dulaan ug uban pang makatabang sa mga pasyente.

AMARE ET SERVIRE
Human sa adlaw sa ilang pagbisita, gilusad usab alang sa maong pondok ang Amare et Servire (Pagmahal ug Pagsilbi sa Ginoo) Box.

Kini usa ka proyekto nga ang mga tinun-an mahimong ambassador sa sulod sa 20 ka adlaw. Himuon nila ang paghalad ug pinansiyal nga hinabang sa kahon (Amare et Servire Box) aron ipadala sa House of Hope nga makatabang sa pagpalit sa tambal sa mga pasyente.

Matod pa ni Ms. Annie P. Tabunan, usa sa Campus Minister sa Ateneo de Davao Grade School, ang pagpadagan sa Amare et Servire Box, usa ka konkretong tubag sa pagtoo sa mga estudyante human makighimamat sa mga pasyente sa House of Hope.

Dugang pa niini, ang paggahin ug panahon sa pagbisita sa House of Hope nagpakita usab nga ang gugma ug kaluoy dili lamang ipakita sa Tuig sa Kalooy ug matapos sa usa ka selebrasyon, apan kini magpadayon hangtod nga naay nanginahanglan.

Tungod sa maong kasinatian, nanghinaot ang tulunghaan nga mahimong maginhatagon, maluluoy ug kanunay nga mapasalamaton ang mga tinun-an ug kini ilang puy-an sa tibuok nilang kinabuhi. (Flor A. Deloria | HFP SocCom)