“Ikaw ba kadtong moanhi, o magpaabut pa ba kami’g lain?”

Ikatulong Domingo sa Adbiyento
Is. 35:1-6a, 10/ Salmo 146:6-10/ Santiago 5:7-10/ Mt 11:2-11

Naay mga pangutana nga lisod tubagon ug mga kasinatian nga lisod sabton.

Diha sa sulat ngadto sa mga Hebreo atong mabasa: “Karon ang pagtoo mao ang pagsalig kanato sa mga butang nga atong ginapaabut, ug ang panghimatuod sa pagkaana sa mga butang nga dili nato makita” (11:1). Ang pagtoo nga gihisgutan dinhi wala magpasabot nga nasayod kita sa tanan. Kay sa pagkatinood limitado ang atong kaalam mahitungod sa Ginoo. May utlanan ang kaalam sa tao. Apan luyo niini, wala kita magduhaduha nga ang Ginoo tinuod ug buhi ug ang Iyang gugma walay kinutuban. Walay pagduhaduha apan may mga kalisdanan sa pagsabut.

Tataw diha sa atong ebanghelyo ang mga kalisdanan ni Juan sa pagsabut mahitungod kang Hesus ang Mesiyas. Gipahiuyon ni Hesus ang pagpasabut kang Juan nga ang Mesiyas nga ilang gipaabot dli usa ka Maghuhukum apan una ug labaw sa tanan Manluluwas. Wala mihunong si Juan sa pagpangita ug lamdag sa iyang kalisod aron mamahimong coherent ug reasonable ang iyang pagtoo. Ug asa man siya miadto aron sa pagpangita ug lamdag? Miadto siya kang Hesus. Kang Hesus niya nakaplagan ang tubag sa iyang pangutana ug inspirasyon sa iyang kalisod. May kapuslanan gayud ang objective nga pag-estudyo mahitungod sa atong pagtuo.

Ug mao kini ang angay natong pagabuhaton. Atong ipunting ang atong mga mata ngadto sa Ginoo. Sa mga panahon nga maglisod kita ug pagpangita ug tubag sa atong mga pangutana modangop kita sa Ginoo aron malamdagan ug magiyahan Niya ang atong hunahuna. Naay mga pagduhaduha ug mga kalisdanan nga moabot sa atong kinabuhi, apan kung magpabilin kitang lig-on sa atong pagtoo ug sa pagsud-ong sa kahayag sa Iyang nawong tubagon gayud Niya ang atong mga pag-ampo, luwason kita Niya sa tanang mga dautan, Iyang lamdagan ang atong mga hunahuna ug Iyang papason ang atong mga kabalaka.

Mag-ampo kita ngadto sa Ginoo nga tabangan kita Niya sa paglahutay ug sa pag-antos sa bisan unsa nga mga pagsulay ug kalisud nga atong mahibalag sa atong kunabuhi. Ug atong hinumduman nga ang tugkaranan sa atong pagtuo mao ang kamatuoran.

Fr. Zaldy Abonales
Chaplain
Davao Medical School Foundation, Inc.