Community Awareness Seminar Gipahigayon

Gipahigayon ang Community Awareness Seminar sa St. Mary of the Perpetual Rosary Parish kaniadtong Nobyembre 27, 2016 sa St. Mary Parish for Peace and Livelihood Training Center. Gidumala kini sa Davao City Police Office pinaagi sa Buhangin Police Station Commander nga si Police Chief Inspector Milgrace C. Driz uban ni SPO4 Lucilito Humol sa Explosive Ordnance Division ug SPO2 Noel B. Apostol.

Ang seminar gipasiugda aron sa pagtubag sa panginahanglan sa katilingban nga nahisakop sa Parokya pinaagi sa pagpakabana sa palibot ug sa kahimtang sa panahon karon nga adunay mga hulga sa kasamok. Gitambongan kini sa 180 ka mga GKK Servant Leaders ug pipila ka mga parokyano.

Gipaambit ni PCI Milgrace Driz nga magpakabana ug maabtikon nga magbinantayon ang katawhan sa mga panghitabo sa palibot sa katilingban diin nahisakop sa Parokya. Gi-awhag sa Police Station Commander sa Buhangin nga mokooperar ug moreport dayon sa mga kapulisan kung adunay namatikdan nga mga krimen ug ubang nanghitabo sa mga katilingban sakop sa Parokya.

Gi-demonstrar ug gipakita ni SPO4 Lucilito Humol ang nagkalain-laing mga explosive devices aron mahibaw-an ug makabantay ang katilingban sa mga butang nga katingalahan aron nga malikayan ang dautang panghitabo.

Agi’g tubag niini ang mga PSK maghimo og pamaagi sa pag organisa sa ilang grupo aron mag monitor nga malikayan ang dautang panghitabo panahon sa offering sa Santos nga Misa ilabina karong umaabut nga Misa de Gallo.

Ang ministriya sa PSL mapahingusgan ang ilang marshall group sa tibuok kalihukan sa parokya ilabina diha sa Santos nga Misa ug sa palibot sa simbahan sama sa parking area. Ang ministriya sa PSA palig-onon usab ang kasamtangang grupo sa First Aid.

Ang malampusong seminar gipasiugdahan sa Parish Social Action Ministry pinaagi sa coordinator nga si Joel Corage ubos sa pag suporta ni Fr. Jess Samaniego, kura paroko. (Hermie Mapute, SMP SoCCom)