Ayaw kahadlok

Fourth Sunday of Advent
Is 7:10-14, Rom. 1:1-7, Mt. 1:18-25

“Ayaw kahadlok…” Mao kini ang akong tema nga napili sa akong ordinasyon sa pagkapari. Mga pulong nga nagdasig kanako sa pagdawat sa dakung gasa sa ordinasyon bisan pa man sa akong kahuyang ug kabatan-on.

Mga igsoon ko diha kang Kristo, sa akong pamalandong mao usab kini ang mensahe sa Ginoo alang kanatong tanan niining ika-upat nga Dominggo sa Adbiyento. Sa atong unang pagbasa, sa basahon ni propeta Isaiah gipanagna na daan ang pangalan sa atong manluluwas, “Emmanuel” nga sa ato pa, “Ang Ginoo uban kanato”. Ug kung ang Ginoo uban kanato, unsa man ang atong kahadlukan? Sa atong ikaduhang pagbasa, gisugdan ni San Pablo ang iyang sulat ngadto sa taga-Roma pinaagi sa pagpaila nga siya solugoon ni Kristo. Tungod niana wala siya’y kahadlok sa pagsangyaw sa pulong sa Dios kay nasayod siya nga si Kristo naga-uban gayod kaniya. Sa atong ebanghelyo, si San Jose naglaraw sa pagpakigbulag kang Maria sa hilom tungod sa kahadlok. Kahadlok nga makasupak sa balaod kay siya matarong nga tawo. Apan sa dihang nagpakita kaniya ang angel ug miingon kaniya, “Ayaw kahadlok…” Sayo sa buntag mibangon si San Jose ug gituman ang gisugo sa anghel kaniya. Ang mga pulong sa angel nga “Ayaw kahadlok!” mao ang nagdasig kaniya sa pagdawat kang Maria ug pagdawat sa plano sa Dios alang kaniya.

Kitang tanan adunay kahadlok sa atong kinabuhi; kahadlok mamatay, kahadlok mabagsak sa exam, kahadlok malayo sa ginikanan, kahadlok mawad-an og trabaho, kahadlok mahutdan og kwarta, kahadlok nga walay makaon ug uban pa nga atong gikahadlukan. Apan sa tanan nga atong gikahadlukan, kita karon Iyang gipahinumduman nga sa kanunay Siya kanato naga-uban. Gani ang pulong “ayaw kahadlok” namantala sa Balaang Kasulatan 365 ka higayon, nga kung atong hunahunaon, sa usa ka tuig adunay 365 ka adlaw. Daw sa matag adlaw kita gipahinumduman nga wala kita’y dapat kahadlukan kay ang Dios sa kanunay kanato naga-uban.

Sa katapusan, sa pipila ka tuig sa akong pagkapari daghan pa gihapon ang akong gikahadlukan apan ang mga pulong nga naghatag kanako’g kusog, ang mga pulong nga naghatag kaisog, ang mga pulong nga nagpalig-on sa akong pagsalig sa Dios, mao ang pulong, “Ayaw kahadlok…”