Alang sa Tanang mga Pangulo ug Miembro sa GKK

Ang Kalinaw sa Ginoo Maanaa Kaninyo!

Ania na kita sa bag-ong tuig sa Simbahan karon, A New Liturgical Year. Niining mga adlaw sa Adbiyento mga adlaw kini nga naghandum ang katawhan sa Dios sa pag-abot sa Mesiyas. Alang kanato karon, naghandum nga unta moabot ug anaa na gayud unta sa atong kinabuhi ang Dios.

Diha sa atong mga GKK, ato gud kining sination sa atong mga Kasaulogan sa Pulong (KSD, KSP HP) diha sa mga awit ug mga dekorasyon. Sama pananglit sa Advent Wreath. Ako gyud nga damgo nga mahimo kini nga tradisyon o kustombre diha sa matag panimalay o Pundok Banay.

Mahimo nga ang seremonyas sa pagpahigayon sa Advent Wreath himoon sa matag pamilya ug Pundok Banay. Ipadayon usab ang pagbutang sa Advent Wreath sa sulod sa kapilya.

Ikaduha, ang Belen. Hangyo ko nga tagaan ninyo ug pagtagad ang pagpanindot sa Belen diha sa kapilya ug matag panimalay.

“Ang Belen sa kapilya himoa nga sayon duolon labina diha sa paghalok sa Nino Hesus.”

Ikatulo, ang Parol, nindot nga Pilipinhong Tradisyon. Bantayi nga sa paghimo niini, parol gyud. Kini nagpadayag sa kahayag. Ayaw palabii ang arte nga dili masabtan ang dagway ug kahulugan niini. Dili apil sa dekorasyon ang Santa Claus ug Reindeer. Akong naobserbahan kasagaran, mas nindot pa ang Christmas Tree kaysa mga Belen ug Parol. Labaw sa tanan, pagkasubo kung sa panimalay, adunay Christmas Tree nga walay Belen.

Ikaupat, ang Misa de Gallo, nabatasan na sa kadaghanan nato maanad nga kumpletuhon ang pag-apil sa siyam ka adlaw nga Misa De Gallo. Pagkaanindot! Apan hinumduman nato nga kini pagpangandam alang sa kasaulogan sa Pagpakatawo sa atong Ginoong Hesus sa gabii sa Desyembre 24 ug sa adlaw mismo sa Desyembre 25.

Ikalima, panahon sa Adbiento, adunay mga Advent Recollection nga ginapahigayon ang matag parokya. Giawhag ko kamo sa pag apil niini kauban ang inyong mga pamilya. Kini makatabang sa atong pagpangandam sa kaugalingon sa pagpaabot sa atong Mesiyas ug sa pagpalawom sa atong adlaw nga pagbati sa Iyang presensya sa atong Kinabuhi.

Sa katapusan, ako manghinaut nga ang panahon sa Adbiento maghatud unta kanato sa usa ka Malipayon, Malinawon, Mabulukon ug Mabungahon nga Kasaulogan sa Pasko sa pagkatawo sa atong Ginoo.

Kaninyo kanunay nakig-uban diha sa pag-ampo,

+ROMULO G. VALLES, D.D.
Archbishop of Davao