3-in-1 kasaulogan uban ni Bishop Pat

Gisaulog ang Disyembre dos ug tres sa dakong kalipay sa tradisyon sa katawhan sa Diyos sa diyosesis sa Mati. Una, ang Dec. 2 ang ika-77 nga adlaw’ng natawhan ni Bishop Emeritus Patricio H. Alo, D.D.

Karong tuiga naduha ang pundok nga nagharana o mananita kaniya, gikan alas 4 sa kaadlawon hangtud alas 5:30AM sa puluy-anan sa Obispo sa Madang, Mati City. Gipangunahan kini sa Holy Name Society of San Nicolas de Tolentino Cathedral ug sa Christ the King GKK, Lower Kapayas, Mati City.

Mitambong ang nagreprisintar sa mga apostolado, GKK, kamadrihan, kaparian, ug mga igsoon ug kaparintihan ni Bishop Pat nga naggikan sa Cotabato, Cebu ug ubang nasud. Ang Clergy House staff pinangulohan ni Clergy House in-charge Fr. Jacinto Ortiza ug mga trabahante sa Trinity Cable Television (TCTV) ang nag-andam sa painit sa St. Therese gym. Misunod ang kasaulogan sa Eukaristiya sa haduol nga Divine Mercy Shrine and Parish nga gi-conselebrar og 20 ka kaparian, lakip si Apostolic Administrator Fr. Edito S. Bano, DCM ug Fr. Eduardo B. Amora gikan sa New York, USA. Sa iyang wali, gipasalamatan ni Bp. Pat ang tanan sa ilang pagduyog sa iyang pagpasalamat sa Diyos sa iyang pag-alagad sa katawhan “as servant shepherd, nga sa kanunay mag-awhag nga puy-an ang pagtuo sa Diyos, ug gidasig ko ang tanan nga isangyaw ang Maayong Balita sa gugma ug kalinaw, ug nga kita mobarog sa kamatuoran nga maoy maghatag og kagawasan ug kaluwasan.”

Gi-broadcast usab ang Santos nga Misa sa radyo (DXHM-AM/ DXDV-FM) ug sa katapusan gilakbit ang mga greetings ug awit, ug usa ka special interview ni Sr. Marietta H. Alo, OND tali sa iyang pag-umangkon si Flora May Kennedy nga naggikan sa Honolulu City, Hawaii, ug 1st time sa Mati ug Davao, apan nakaila sa kaparian sa Mati nga nadestino sa Hawaii, sama ni Fr. Jose A. Macoy, DCM. Aloha, Mele Kalikimaka! (Hawaiian “Hello, Merry Christmas”) maoy patimbaya ni Kennedy sa tanang tigpaminaw.

Oras sa mga piniriso ang gitakda sa alas 10:15AM, kanus-a gihatud nila Bishop Alo, Sr. Melvin Manligoy ug Engr. Alan Huertas sa TCTV, ug mga kaubanan ug bisita ang pack-lunch ug drinks alang sa 191 ka mga piniriso (117 lalaki, 20 babaye) sa provincial jail. Nibalus usab ang mga inmates og mga awit ug pamaskong panaygon alang sa Obispo. Sa iyang bahin, amahanon usab nga gisulti ni Bp. Pat nga magmalipayon sila sa pagsalig sa Diyos bisan pa man kon nahibulag sa ilang mga pamilya, ug gitambagan niya sila nga magpakabut-an ug tumanon ang ilang “reform” sa diwa sa pagtuo ug pagtahud sa Diyos ug sa usag-usa isip mga anak sa Diyos. Si Sr. Melvin ang miluwat og dugang mga pulong sa pagpasalamat sa ngalan sa Obispo, sa TCTV, ug ang managlahing mga bisitang mikuyog sa pagduaw sa prisohan.

Sunod nagtapok ang bagang katawhan sa mga yanong tawo sa gate sa San Juan de la Cruz Clergy House Compound aron dawaton ang mga packed lunch ug drinks nga gihatag sa Obispo, samtang mga kaparian, kamadrehan ug guests ang nagtapok sa bag-ong Retirement Home ni Bp. Pat sa Madang, alang sa pagbendita niini. Alas 11:30AM gidagkot ang mga kandila ug si Fr. Amora nibasa sa Blessing Liturgy ug sila ni Bp. Alo ang mibendita sa mga lawak sa bag-ong residence nga aduna pa’y tiwasonon. Si Fr. Edilberto R. Mahinay sa ngalan sa Clergy nga nag-sponsor sa paniudto ang nagsilbing announcer ug tigpaila sa maong aktibidad. Si Fr. Nestor B. Morata ang nanguna sa meal prayer. Ang house blessing ang nagsilbing 2nd special event sa “Three-In-One.”

Ikatulo mao ang 53rd Parocial Fiesta sa San Francisco Javier parish sa Governor Generoso (Sigaboy) Dec. 3, 2016. Si Bp. Pat ang presider sa 9:00 AM Fiesta Mass, inubanan sa 30 ka kaparian, bisan pa man kung adunay gibati nga kaluya sa iyang kalawasan si Bp. Alo ug na-ospital niadtong Nov. 23-29, 2016, sumala pa ni Parish Priest Fr. Joel A. Sayson sa iyang pulong sa pagpasalamat human sa Stos. nga Misa.

Sa iyang wali, gipasabot ni Fr. Bano ang kamahinungdanon sa panahon sa Adbiyento sa kalendaryo liturhiko alang sa kausaban sa kaugalingon agig pagpangandam sa pag-abot ni Hesus (2nd coming) samtang gitimaan ang iyang unang pag-abot” sa unang Pasko nga nagasaulog usab sa dakong gugma sa Diyos sa pagpadala sa Iyang bugtong anak sa kalibutan aron magluwas niini gikan sa sala (Jn. 3:16). Atol sa fiesta, gibendisyunan ang bag-ong parish office building nga karon nahibulag na sa parish rectory o sa balay sa pari, samtang gipahigayon ang friendly basketball game tali sa LGU ug Mati Clergy. Giduot usab ni Fr. Sayson ang dakong suporta gikan sa LGU pinaagi ni Mayor Katrina Orencia ug Vice-Mayor Vicente Orencia, ang amahan, lakip ni Gov. Nelson Dayanghirang nga mitambong usab sa kapistahan. Tagsa-tagsa nga gipaila ni Fr. Joel ang concelebrating priests ug ang nagkadaiyang mga parokya. Mga parochial vicars sa Sigaboy parish mao sila Diocesan Liturgy in charge Fr. Barry Gil R. Pilar ug Fr. Samuel R. Bronola.