Tuig sa Parokya (Part 2)

Mga GKK sa atong mga parokya

Dakong bahin sa pastoral sa mga parokya nato karon mao ang pagtukod ug pagpalambo sa mga Gagmayng Kristohanong Katilingban (GKK). Daghan ng mga parokyano ang nahibalo niini ug nakiglambigit kanila, ilabi na sa mga kabaryohan. Sa sentro sa lungsod o sa mga syudad, daghan pa kaayo ang wala kabalo ug wala pa mangapil. Mas makahuluganon o sayon pa kanila ang didto lang diritso sa simbahan sa parokya mangilabot.

Ang tema niining tuiga sa parokya haom kaayo alang sa pagpatunhay ug pagpalambo pa sa kamahinungdanon ug kamakahuluganon sa mga GKK sa mga parokyano. Kini ang tema: Pagumol sa mga GKK nga instrumento sa panaghiusa, sa pagapil ug sa misyon.

Sa pagkakaron dinhi sa Diyosesis sa Digos, miabot na sa 1262 ang gidaghanon sa mga GKK. Unsa nay kahimtang?

Mapasalamaton kaayo kita sa pagkamugna sa atong mga GKK sukad pa sa sinugdanan sa dyosesis. Tungod sa mga GKK natagaan ang mga magtotoong Katoliko sa higayon sa pagsalmot sa kinabuhib ug pagpangalagad sa Simbahan diha sa ilang dapit. Napasayon usab sa Simbahan nga makigkambigit sa iyang mga ginsakpan.

Apan, angay usab dawaton nga sa kinatibuk-an, gisinati sa daghang mga nangulo ug nangalagad, nga ang GKK giisip lamang isip usa sa mga programa pastoral sa Simbahan, ug dili isip paagi sa pamuyo sa Kristohanong kinabuhi sa mga tinun-an ni Kristo. Ang mga GKK nato dili pa kusog ug klaro ang epekto sa pamuyo sa mga tawo, gawas sa mga debosyon ug pagpiyesta.

lkaduha, ang pagtoo sa kadaghanang sakop dili kaayo buhi ug hamtong. Mas daghan ang dili aktibo. Wala sila mahimong igpapatubo alang sa kausaban sa katilingban, padulong sa kamatuoran, kaangayan, gugma ug kagawasan, ug ngadto sa kaugmaran sa tanang lungsuranon. Masaksihan kining panagbulag sa pagtoo, sa usa ka bahin, ug ang inadlaw-adlaw nga pagkinabuhi sa mga katoliko, sa laing bahin. Makita nato kini diha sa natMakita nato kini diha sa natad sa pagnegosyo, sa panguma, sa edukasyon, sa politika, serbisyo publiko, sa Media, sa mga kriminalidad.

Alang sa dugang paglambo sa atong mga GKK, kinahanglan unahon karon ang malukpanong New Evangelization, kanang pagsangayaw sa Ebanghelyo pagusab sa tanang katoliko, ilabi na sila nga nagmabugnawon na ug nagtalikod na sa ilang namat-an nga pagtoo sa Dios ug Simbahan. Mangadto na usab kita balay-balay ug ipalanaog pagusab kanila ang tawag sa Ginoo nga maghinulsol ang tawo sa mga sala, motoo, ug mosunod Kaniya. Ang matag tinun-ang katoliko maoy mangadto kanila sa pinaagi sa Simbahan, uban sa Simbahan ug diha sa Simbahan.

Ang mga nasangyawan na pagusab ug positibong motubag sa Ginoo nga maglakaw na usab sa pagtoo, kinahanglan nga padayonon ang pakig-uban kanila pinaagi sa mapadayonong kateksis hangtod nga mohamtong ug magbunga’g daghan sa pagtoo. Kaakuhan kini sa parokya pinanguluhan sa kura paroko. (mosunod ang ika-3 bahin sunod semana)