Testimonya sa kalooy nabati sa parokya sa San Antonio

Subay sa mandato sa Arkidiyosesis sa Dabaw nga magbuhat ang matag parokya og mga buluhaton alang niining pagtapos, ang parokya sa San Antonio de Padua sa Agdao, nagsaulog sa pagtapos sa Ekstraordinaryong Hubileyo sa Tuig sa Kalooy niadtong Nobiyembre 19 niining tuig.

Gisugdan kini sa Santos nga Misa. Misunod ang exposition sa Blessed Sacrament dayon ang pagbihilya o vigil service. Nauna ang mga GSLs ug miyembro sa Zones 1 ug 6 (7-8pm), gisundan kini sa Zones 2, 3 ug 7 (8-9pm), dayon ang Zones 4 ug 8 (9-10pm) ug ang Zones 6 ug 9 (10-11pm).

Matag oras nga pagbihilya adunay nagpaambit mahitungod kung unsa ang ilang nabuhat o gibuhat panahon niining Tuig sa Kalooy diha sa ilang pagtoo. Madasigon ug malipayon kaayo ang mga nagpaambit sa ilang kasinatian, maski ang kakulba anaa sa ilang mga panagway.

Apil sa matag oras nga pagbihilya, giampo ang Divine Mercy Chaplet, pag-ampo sa atong Santo Papa Francisco alang sa Hubileyo sa Tuig sa Kalooy ug ang mensahe sa atong Arsobispo sa Dabaw, Romulo G. Valles.

Makita sa mga panagway sa mga misalmot sa maong panagtigum ang kalipay, pagpamalandong ug pakig-estorya sa Ginoo pinaagi diha sa pag-ampo. Apil sa panagtigum ang among kura paroko, Padre Toto España, mga Theologian II seminarians nga naassign sa parokya, mga GKK Servant Leaders, Tigpasayon Pundok Banay, miyembro, hamtong, bata ug batan-on.

Sa katapusan malipayon usab ang mga nagpasiugda sa maong panagtigum bisan pa man sa kakapoy ug kagutom nga nabati, apan anaa gihapon ug makita sa ilang mga panagway ang kalipay nga nasinati diha sa presensiya sa matag usa ug sa Ginoo nga kanunay anaa sa atong taliwala. (Gary Guivencan | SAP SoCCom)