SUGID team andam na aron mubalita

Pinaagi sa inisyatibo ni Most Rev. Guillermo D. Afable, DD., Obispo sa Diyosesis sa Digos ug sa ayuda sa Davao Verbum Dei Media Foundation, Inc. pinaagi sa Davao Catholic Herald ug DXGN 89.9 Spirit FM, nagkatapok pag-usab ang SUGID Team sa Diyosesis sa Digos aron sa pag-apil sa “Media Baby ka ba?” Radio Broadcasting and News Writing Training niadtong Nobyembre 12, 2016.

Diha sa maong pagbansay adunay mga punto nga gipasabot si Rev. Fr. Ritsche J. Gamaya, DCD, Direktor sa DVDMFI mahitungod sa “Inter Mirifica”, ang dokumento sa Katolikong Simbahan mahitungod sa Social Communications.

Gisundan kini ug mga pagpasabot mahitungod sa mga giya sa pagsulat ug balita alang sa mantalaan ug pagsulat ug balita alang sa radyo.

Gipasabot ni Bishop Guillermo “Jimmy” Afable, Obispo sa Diyosesis sa Digos, ang pagkamahinungdanon sa pagsugid sa Maayong Balita mahitungod kang Hesus ngadto sa uban.

Sa maong panahon usab nahimamat sa SUGID team si Rev. Fr. Allan Joie Nunez, DCD, director sa Commission on Social Communication sa maong Diyosesis. Nakasabutan nga ang regular nga meeting alang sa SUGID pagahimuon na kada ikaduhang Sabado sa bulan. Ang sunod meting mahitabo karong Disyembre 10, alas 10 sa buntag sa Clergy House sa Digos. (Al Divinagracia, Sugid|Bansalan)