Solemnidad ni Kristong Hari

Sulod sa usa ka semana atong saulugon ang Solemnidad ni Kristong Hari. Mao kini usab ang nag marka sa katapusan sa liturhikanhong tuig, ug nagtakna sa pagsugod sa panahon sa Adbiyento, ang panahon sa malaumong pagpa-abot sa pagkatawo ni Jesucristo.

Gipinta sa atong mga pagbasa sulod niing Solemnidad, ang pagkahari ni Kristo kanatong tanan – hari sa tibuok kalibutan, “kay pinaagi kaniya gibuhat ang tanang mga butang, diha sa langit ug dinhi sa yuta, makita ug dili makita… ang tanang mga butang gibuhat pinaagi kaniya ug alang kaniya.”

Siya ang Alpha ug ang Omega, ang Sinugdan ug Katapusan natong tanan. Sa iya ang atong paglaum ug Kaniya ang atong kaluwasan. Siya mao ang Hari natong tanan.

Apan ang pagkahari ni Kristo dili sumala sa pagkahari niining kalibutana. Ang puwersa sa iyang pagkahari wala manukad sa yutan-ong gahum, ni sa salapi, ni sa impluwensya.

Ang puwersa sa iyang pagkahari nagagikan sa iyang pagka Siya, Anak sa tunhay nga Dios, ug sa gugma sa Amahan. Ang puwersa nga nagpasugod sa tibuok istorya sa kaluwasan nga nakaabot sa iyang kinatas-ang punto diha sa pagkatawo ni Cristo, ang Mesiyas.

Diha sa atong ebanghelyo, gipakita ni Kristo ang iyang tinuod na gahum ug ang tinuod niyang gingharian.

Diha sa Krus, sa wala pa siya namatay, ningsaad siya ngadto sa usa ka kriminal nga nagbitay kauban niya: “Sa pagkatinuod, magaingon ako kanimo, nga karong adlawa adto ikaw sa Paraiso uban kanako.”

Ang iyang gahum dili lamang niining kalibutan, kundili apil usab ang kalibutan nga umaabot – ang kinabuhi kauban ang Ginoo.

Si Kristo, ang Mesiyas, ,mao usab ang nawong nga makita sa kalo-oy sa atong Ginoo.

Karong adlawa ato pong pagataposon ang ekstraordinaryong “Tuig sa Hubileyo sa Kalooy,” ug diha sa atong pagtapos, hinaot nga nahimo pud kitang nawong sa kalo-oy diha sa atong mga igsuon nga gigutom, giuhaw, ug nanginahanglan.

Diha sa atong pagsaulog sa Solemnidad ni Kristong Hari, mapahinumduman unta kita sa tinuod nga kahulogan sa Iyang gahum alang kanato.

Dili unta nato kalimtan nga si Kristong Hari mao usab ang Hari sa kalo-oy nga nagdapit sa ato sa kanunay sa pagtan-aw sa uban isip atong igsoon.