Si Jesucristo ang star!

Karong dominggo ang unang semana sa adbiento, mao kini ang panahon kung diin kita nagpaabot ug nangandam sa pag abot sa Mesiyas nga si Jesus.

Ang atong pagpaabot usa ka pagpaabot nga malaumon ug puno sa pagtuo ug pagsalig, kay tumanon gayod sa Ginoo ang iyang saad nga Mesiyas alang kanato. Ang atong kaluwasan haduol na, kay ang ang atong manluluwas matawo na gayod.

Apan ang pangutana, andam na ba kita sa pagsugat sa atong manluluwas?

Aduna bay lugar ang bata nga Jesus dinha sa atong kinabuhi?

Sa ikaduhang pagbasa kita gipahinumduman ni San Pablo sa pagwagtang sa mga buhat nga mangitngit ug sa pagsul-ob sa bisti sa kahayag tungod kay haduol na ang adlaw sa atong kaluwasan – ang kaluwasan nga gidala ni Jesucristo diha sa iyang pagkahimugso aning atong kalibutan.

Sama sa mga nangaging semana, ang atong ebanghelyo nagsentro na pud sa tema sa pagpangandam. Kita gipahinumduman nga walay nasayod sa pag abot sa atong Ginoo. Kini nga pag abot dako ug puruhan nag hisgot kanato sa “parousia” o ang ikaduhang pag balik nga madaugon sa atong Ginoo nga si Jesucristo.

Kita giaghat sa pagpangandam, kay sama sa usa ka tagbalay nga nasayod nga lungkabon sa kawatan ang iyang paminalay magbantay gayud siya para siya dili makawatan.

Kitang tanan nasayod nga ang Ginoo mubalik pag usab, sa tinuod lang ato gani ning ginapadayag kanunay kada dominggo diha sa atong “credo” nga si Jesus mubalik pag usab.

Wala gayod nagkulang sa pagpahimangno ang Ginoo sa iyang pagbalik mao nga mangutana ta pag usab sa atong kaugalingon, andam na ba kita sa Iyang pag abot?

Kinatudluan sa ebanghelyo na mas importante ang pangutana kung giunsa nato pagpangandam kaysa kanus-a muabot ang Ginoo.

Hinaot pa unta nga diha sa atong pagpangandam sa pag abot sa atong Ginoo, dili unta nato makalimtan ngano ug kinsa ang atong gipaabot. Garbo nato kay nailhan ang atong nasod isip nasod kung diin pinakaduhay ang pag selebrar sa pasko. Apan kanunay naa ang peligro nga mahimong “very materialistic” ang pagpangandam sa pasko nga imbis nga si Jesus ang sentro sa atong pagpangandan usahay mas mahimo pang importante si Santa Claus.

Dili unta nato kalimtan nga diha sa atong pagpangandam sa pasko si Jesucristo unta gihapon ang star!