Pista sa GKK Christ the King gisugdan ug asembliya

Ang pre-fiesta assembly gipahigayon sa GKK Christ the King, Bread Village, Buhangin niadtong November 8, 2016 sa alas 7:30 sa gabii. Kini sakop sa Parokya sa St. Mary of the Perpetual Rosary Parish. Ang asembliya gitambungan sa mga GKK Servant Leaders, miyembro sa GKK ug sa Pastoral Team gikan sa Parokya.

Gipahibalo sa Pangulo sa Katilingban kon PSK ang mga kalihukan nga nahimo sa GKK, mga problema nga nasinati sulod sa usa katuig, mga plano nga himoon sa umaabot nga kapistahan lakip na ang mga priorities niini. Nagreport usab ang Treasurer sa status sa panudlanan sa GKK.

Ang kapistahan sa GKK Christ the King saulogon karong November 19, 2016. Magsugod ang misa sa Nobyembre 19 sa alas 8:00 sa buntag nga pangulohan sa Kura Paroko nga si Fr. Jess Samaniego.

Pagasugdan ang siyam (9) ka adlaw nga pagrosaryo ug novena karong Nobyembre 10, alas 7:00 sa gabii. Imbitado ang mga Pangulo sa Liturhiya sa nagka lain-laing GKK aron sa pagsaulog sa maong kalihukan, kauban sa duha (2) ka PSL sa GKK Christ the King nga sina Chen Angco ug Richard Boyano.

Mipadayag ang Pastoral Team sa ilang kahimuot sa maayo nga pag presenta sa PSK. Matud pa ni Bro. Diony Daro, GKK Parish Coordinator nga mas maayo ang pagkaplastar sa han-ay ug sistema sa asembliya karong tuiga. Dinhi mapasalamaton ug malipayon ang mga GKK servant leaders sa katilingban sa GKK Christ the King. (Ma. Teresa Amor, SMPRP GKK SoCCom)