Parokyano sa San Miguel, nagpanawduaw

Malampusong gipahigayon sa kapin 300 ka mga parokyano ni Sr. San Miguel sa Panacan ang panawduaw ngadto sa Balaang Pultahan sa San Pedro Cathedral niadtong Oktubre 29, 2016. Misalmot niini mao ang mga pangulo sa mga GKK, mga organisasyon ug apostolado. Ang uban usab gidala gayud ang ilang tibuok pamilya lakip ang ilang mga kabataan.

Agi ug pagpangandam, gihimo ang pagpakumpisal sa tanang buot mosalmot sa panaw-duaw niadtong gabii sa Oktubre 28, ug kini napahigayon sa presensya sa lima ka pari gikan sa mga sikbit nga parokya. Pagka ugma, sa alas singko sa buntag gisaulog ang Santos nga Misa human sa prosesyon ug pag-ampo sa Santos nga Rosaryo agi ug pagtapos usab sa Bulan sa Rosaryo.

Sulod sa Santos nga Misa, gi-orient ang tanan sa tumong ug kahulogan sa pagahimuong panaw-duaw nianang buntaga.

Gisugdan ang paglakaw gikan Osmeña Park padulong sa Balaang Pultahan. Gipangulohan ni Fr. Jun ang mga pag-ampo ug pamalandong. Gipadayon ang solemni nga mga pag-ampo hangtud sa kasaulogan sa Santos nga Misa sa San Pedro Cathedral alas dose sa udto.

Gilauman nga nahimong mabungahon ug makahuloganon ang maong talagsaong kasinatian sa mga peregrino atol sa kasaulogan sa Hubileyo sa Tuig sa Kalooy nga gisaulog sa Simbahang Katoliko sa tibuok kalibutan. (Eleanor Pascua | SMP SoCCom)