Kalag sa minatay sa Malabog nagmalinawong gihandum

Nagmalinawon ang pagsaulog sa Adlaw sa mga Kalag sa mga parokyano sa San Roque Parish, Malabog niadtong November 2, 2016 sa Malabog Cemetery diin adunay kapin usa ka libo nga mga tao ang nangadto sa pagbisita sa lubnganan sa ilang mahal sa kinabuhi.

Ang kura paroko nga si Rev. Fr. Jemasol Ortiz ug ni Rev. Jeus ang nag misa didto sa dakong krus sa sementeryo nga mabaktas lamang 30 minutos gikan sa sentro sa Malabog. Human sa Santos nga Misa gisugdan dayon sa Pangulo sa Liturhiya ang pag imbita sa buot magpa-ampo ug magpabendita sa lubnganan sa ilang minahal sa kinabuhi.

Matud pa ni Teresita Tura gikan sa GKK Santa Cecilia, misayo siya pag-adto sa sementeryo aron makaapil siya sa Misa kauban ang iyang mga anak ug apo. Nakahigayon na sad siya ug paglimpyo sa lubnganan sa iyang anak nga si Richard, nga bata pa kaayo. “Gibati gihapon nako nga nagauban pa gihapon siya sa amoa hangtod karon. Birthday niya ug Kalag-kalag kami nagabisita kaniya diri sa menteryo.”

Namatikdan ni PO2 Fernando Andan, usa sa mga nagbantay nga pulis nga adunay kapin 1,500 ka mga tao ang nanulod sa sementeryo sa duha ka adlaw nilang pagbantay. “Normal lang ang sitwasyon, gituman namo ang mando sa kapulisan sa Davao City sa pagpatuman sa hapsay ug kalinaw. Nagbutang kami ug tarpaulin sa entrance sa menteryo ug naka post didto ang mga pahimangno sa katawhan nga buot musulod sa menteryo.”

Nagpasalamat si Alma Novo, barangay staff sa Malabog sa kapitan sa Malabog nga si Jessielito Areja sa pagpapakyaw niini sa duha ka adlaw nga pagpalimpyo sa menteryo aron dali ra makit-an sa mga hingtungdan ang lubnganan sa ilang mahal sa kinabuhi.

Ang Krus nagpahinumdum kanato nga gidaug na ni Kristo ang kamatayon, ug sa ngadto ngadto kita mag-uban kaniya sa kinabuhing walay katapusan. Samtang buhi, kita angayang mag-ampo alang sa mga kalag hilabi na sa purgatoryo. (Imelda Overiz | SRP SoCCom)