Family counseling skills training giorganisa sa Dabaw

Ang Family and Life Apostolate sa Archdiocese of Davao nagpahigayon og “Basic Helping Skills in Counseling for the Poor” sa Assumption Parish, Torres Street, Davao City, niadtong Nov. 11-13, 2016. Kini gitambungan sa 39 ka mga partisipante gikan sa 14 ka mga parokya. Tumong niini nga mahatagan ang partisipante sa ilang kahanas sa Tigtambayayong (Counseling).

Ang mga nagpaambit mao sila sila Bro. Louie Dongog, Sis. Divina Rama ug ni Warlita Fontanoza nga taga Family and Life Apostolate, Commission on Formation, Archdiocese sa Cebu. Human ang training, naandam na ang tanan nga motubag sa hangyo sa FLA Director, Rev. Fr. Orly Angelia sa panginahanglan sa Pastoral Care of the Marriage Tribunal.

Sumala sa hagit ni Rev. Fr. Junar de la Victoria, Canon Lawyer and the Judicial Vicar of the Archdiocese of Davao nga nagkanayon, sa dili pa ihatag ang Declaration of Nullity, moagi una ang magtiayon sa Counseling ug ingon usab sa pagtabang ug paggiya sa mga pamilya niining atong mga Voluntary Submission for Reformation (VSR) dinhi sa atong dakbayan ubos sa programa sa atong simbahan, Sagop Kinabuhi II.

Matud pa ni Jomar Racho, usa sa mga partisipante nga daku kining grasya gikan sa Ginoo. “It’s God’s great providence…it provided me a concise knowledge and technique in doing counseling which is not giving any advise to the counselee. Second, it made me realized that many problems, if not all can still be solved by using the basic steps and techniques in counseling. Third, always think positive from the start of the counseling.” Ang seminar nagtudlo usab nga angay ibutang ang Ginoo sa sentro sa kinabuhi. “Sa kining paagiha, ang gahum sa Ginoo ang nagalihok.”

Dugang pa ni Norman Gravino nga gaan ang dagan sa seminar bisan og kini naghisgot o nagtutok sa kinabuhi sa tawo. “Nindot ug maayo ang gihimong pagpasayon sa mga nagdumala. Ang unod sa seminar sayon ug dali rang sabton tungod kay maayo ang pagkahan-ay niini gikan sa Module 1 hangtud Module 3, besides, binisaya pa jud.”

“Ang mga facilitators preparado sa kinatibuk-ang unod ug dili lang sa ilang assignment, nakita nako ang dedikasyon sa ilang paghatag og pagtudlo gawas pa, flexible usab sila. Maayo sila mo establish og rapport sa mga partisipante kay naka open up ang uban sa mga problema sa relasyon maskig hesitant mopadayag (denial pa) ang uban,” dugang ni Norman.

Ang tanang nanambong automatic nga membro na sa Inter Core Group Formation sa mga Pastoral Counselors, diin adunay mapadayonong pagtuon ug pagpahanas sa kahibalo. (Amie Desquitado | SJWP SoCCom)