‘Digital Social Media for Evangelization’ gipahigayon sa Agdao

Ang Social Communications Committee (SoCCom) ug ang “Pagpapadayag”, ang opisyal nga publikasyon, sa San Antonio de Padua Parish, Agdao, misaulog sa ilang ika-tulo ka tuig pinaagi sa pagpahigayon og seminar-workshop, Media Baby ka ba? Digital Media for Evangelization duha ka Dominggo una matapos ang Oktobre sa St. Mary’s Hall ug sa internet cafe duol sa parokya.

Baynte sais ka mga GKK SoCCom ug mga batan-on ang mipartisipar. Gipaila sa training team sa Davao Verbum Dei Media Foundation ang gahum sa social media diha sa pagtutok sa hisgotanan bahin sa Internet, sa Big Data, ug sa kalambigitan niini sa tawo.

Ang expectation nga “sana maintindihan namin ang mga terminology na gagamitin” ug “sana maintindihan namin ang input” positibong natubag pinaagi sa simple ug klaro nga pagpasabot sa impormasyon.

Ang kambal nga sila Justin ug Luigi Felicia, onse ayos, nakapartisipar diha sa pagbinayloay og mga panghunahuna sa mga pangutana ug sa gihimong “reporting” sa matag grupo.

Pahimangno ni Justin nga maghinay hinay ug pag upload sa picture kung asa sila karon “for security purposes”.

“Ang ubang kabatan-onan di na masugo sa ilang ginikanan,” busa matud pa ni Luigi, “mugahin ug daghan pang oras sa ginikanan.”

Niadtong Oktubre 30, ang maong grupo milingkod atubangan sa mga computer aron sa “hands on.” Giabrehan ang mga kaugalingong Facebook account aron sa pagsusi ug paghimo og kabag-ohan niini ug pagmugna sa Facebook page sa ilang tagsa-tagsa ka sona.

Ubos sa pagdumala sa facilitators, ang siyam ka sona nakamugna na ug Facebook pages.

Nanghinaut ang mga “Online Missionaries of God” (OMG) sa San Antonio de Padua Parish nga ang tanan musubay, muapil ug mupalambo sa kaugalingong paggamit sa online accounts aron mapatunhay ang kabubut-on sa Ginoo sa kinabuhi sa tawo. (Elena Corazon Mozo | SAP SoCCom)