DADITAMA Catholic Media Network

Gikalipay nako ang bag-o pa lamang nga gikauyunan sa upat ka diyosesis sa Davao, Digos, Tagum ug Mati nga magnetwork sa among mga social communications apostolate.

Kini nahitabo niadtong Pre-DADITAMA meeting nga gitambongan sa mga nangulo sa apostolado sa matag diyosesis, niadtong Nobiyembre 3, 2016 didto sa Archbishop’s residence sa Davao City.

Atong mahinumduman nga ang Archdiocese sa Davao gipahingusgan ang ilang media apostolate pinaagi sa reopening of DxGN 89.9 Spirit FM ug ang gibag-ong Davao catholic Herald.

Ang Diocese sa Mati usab dugay nang nagdumala sa ilang AM/FM Radio Station ug Cable TV Service.

Ang Diocese sa Tagum kaniadto naay ilang radio station apan nasarado niadto pang panahon sa Martial Law.

Ang Diocese of Digos nagsibya sa block-time radio program pinaagi sa commercial radio ug sa SUGID page sa Davao Catholic Herald newspaper.

Tungod niining panagsabot sa upat ka diyosesis, gikauyunan ang mosunod.

Ang Davao Catholic Herald sa Davao mao nay mahimong subregional Catholic newspaper.

Ang DxGN sa Davao ug DxHm sa Mati mao nay subregional Catholic radio stations.

Ang Diocese sa Tagum Social Communications maoy administrator sa subregional Catholic Website.

Sa ingon niini, gilantaw nga hinayhinay magkatambayayongay ang upat ka diyosesis sa management, marketing, programming, ug uban pa.

Ang social communication apostolate sa mga diyosesis sa Pilipinas gitabangan ug gidugtong sa usag-usa ubos sa pagpahigayon niini sa Catholic Media Network ug sa Episcopal Commission on Social Communication nga gipanguluhan karon ni Bishop Mylo Vergara, obispo sa Diyosesis sa Pasig.

Ang pagpahigayon niining gilantaw nga DADITAMA one Catholic Media Network gisangon sa mga Social communications directors sa matag diyosesis.

Ato silang i-ampo nga magmakugihon sila sa pagpahigayon niini ug masugdan dayon ang unang mga lakang sa katumanan niini.

Sa umaabot nga 2017, Tuig sa Parokya, makatabang kaayo og dako kining networking alang sa gitinguha karon sa Simbahan nga New EVANGELIZATION.

Ang tanan nga mga parokya maabot sa tingog sa Simbahan, nga nagdala sa Maayong Balita alang sa tanang katawhan, ginamit kining tulo ka kahimanan sa komunikasyon – radyo, mantalaan, ug Internet.