Choral competition sa San Antonio de Padua gipasidunggan si Maria

Ang mga GKK sa San Antonio de Padua, Agdao, mipalanog sa ilang mga awit ug pag-ampo alang kay Santa Maria, Inahan sa GKK, diha sa sayo sa kabuntagon nga prosesyon alang sa ika-53 nga kapistahan sa Barangay Sa Virgen di pa lamang dugay.

Mipadayon ang selebrasyon diha sa Santos nga Misa nga gipangulohan ni Reberendo Padre Leonie “Toto” España, kura paroko. Pagkahapon, nagtapok balik ang mga deboto ug gipuno nila ang St. Mary’s Hall alang sa programa nga mipadan-ag sa “Chorale Competition” nga giapilan sa siyam ka sona sa parokya.

“O Maria sa Barangay” ang awit nga gihatagan nila og kinabuhi pinaagi sa kinasingkasing nga pagkanta niini, pagsuot og costumes ug paggamit sa mga props nga haum sa ilang presentasyon.

Resulta sa panagtigi mao nga ang sona 3,6,ug 7 nakadawat sa consolation prize, sona 8, ikatulong ganti, sona 9, ikaduhang ganti, sona 1, unang ganti.

Ang kasaulogan sa kapistahan, nga gisugdan diha sa mga misa sa mga sona hangtud sa programa nagpadayag sa kahiusahan sa GKK isip pagtahan kang Santa Maria, nga Inahan sa GKK, ug sa pagpaningkamot sa pagpuyo sa mga birtud niya sama sa pagka mapaubsanon, matinumanon sa kabubut-on sa Ginoo.