Child Protection Policy palig-onon sa Davao Oriental Schools Division

Palig-onon pa sa Davao Oriental Schools division, sa pagpanguna ni Schools Division Supt. Feliciano Tamondong, ang Child Protection Policy nga maoy usa ka programa sa Dept. of Education.

Kini ang gipahayag ni Mr. Ernesto Cabanes, ang focal person sa Division, kabahin sa special child policy. Gibungat ni Cabanes nga nakahatag na sila ug orientation sa ilang mga district supervisors ug school principals alang sa mas hugot nga pagtamod sa nahisgutang programa. Nahilakip na sa programa ang proteksyon sa mga estudyante batok sa “bullying”.

Sa paglatid sa “bullying”, gipaasabot ni Cabanes nga aduna kini lima ka kategorya, nga mao ang mosunod: 1st- physical bullying, 2nd- social bulling, 3rd – gender-biased bullying, 4th – cyber bullying, ug 5th – ang retaliation.

Dugang pa sa focal person nga gikan niadtong Enero hangtud Agosto ning tuiga, natala sa division ang 226 ka mga kaso o insidente sa bullying.

Ug alang sa hingpit nga pagtuman sa “child protection policy”, gi-require sa Dep-Ed gikan sa mga schools divisions ang pagpasa ug report kon asa natala ang mga kaso sa bullying, smoking, child labor, teen pregnancy, ug pre-marital sex sa nagkada-iyang division.

Gawas niini, aduna say child protection committee nga maoy gitahasan sa paghupot sa naasoy’ng mga kaso sa mga kabataan sa paghimo og imbestigasyon ug rekomendasyon kalabot sa maong mga kaso.

Gipahayag pa ni Mr. Cabanes nga ang special chld policy ang gidisenyo aron mapanalipdan o proteksyonan ang katungod sa mga estudyante ug ma-enganyo sila sa pag-eskwela, ug mahimo usab doble ang ilang pagtutok sa ilahang pagtuon atol usab sa masinati nga maangayon nga palibot.

Mahinungdanon usab ang nahisgutang lihok alang sa kasaulogan sa Children’s Month sa bulan sa Nobyembre.