Ang Tuig sa Parokya

Pasiuna
Sa atong padayong pagnobena niining panahon sa Bag-ong Pagsangyaw sa Ebanghelyo (New Evangelization), ang Parokya maoy tagaan og dakong pagtagad karong tuiga, ubos sa tema: GKK: instrumento sa panaghiusa, pagapil ug misyon. Magsugod kining Tuig sa Parokya sa Unang Dominggo sa Adbiyento Nobiyembre 27, 2016 hangtud sa Dominggo sa Kristong Hari Nobiyembre 26, 2017.

Alang nako, kining tema maoy pinaka importante sa siyam ka mga prioridad pastoral sa atong Simbhan sa Pilipinas. Ang parokya mao man gud ang sinugdanan ug sentro sa kasinatian sa pagkasimbahan. Sugod sa iyang bunyag hangtud sa iyang paglubong. Ang gitinguha sa Simbahan karon nga New Evangelization mahitabo pinaagi sa parokya, diha kaniya ug uban kaniya.

Agi’g pagtabang kanato sa pagsaulog niining tuiga, ania ang pipila ka mga pamahayag ug pagawhag sugod karong dominggoha.

PART 1

Unsa diay ang parokya?

Atong paminawon unsay giingon sa Ika-2 Konsilyo Plenaryo sa Pilipinas (PCP II) bahin s aparokya. “Ang parokya usa sa labing importanteng paagi ug luna alang sa pagbag-o ug pagpalambo sa Simbahan. Dinhi makanunayong masinati sa magtotoo ang tanang pagpangalagad ug kinabuhi sa Simbahan. Sa matag diyosesis, ang parokya maoy naandan nga luna diin ang mga magtotoo nagatigum aron molambo sa kasantos, moapil sa misyon sa Simbahan ug masinati nila ang simbahanong panaghiusa.” (PCP II, 598)

Si Papa Francisco, sa iyang Evangelii Gaudium (2013) nagkanayon nga ang ” parokya maoy presensya sa Simbahan sa usa ka lugar. Usa kini nga luna alang sa pagpamati sa Pulong sa Dios, alang sa paglambo sa Kristohanong kinabuhi, alang sa pakigtagboay, alang sa pagsangyaw sa Ebanghelyo, alang sa mga buhat sa gugma, ug alang sa pagsimba ug pagsaulog sa pagtoo. Usa kini ka katilingban sa mga katilingban, usa ka sanctuario diin ang mga giuhaw moduol aron moinom sa panahon sa ilang panaw ug sentro sa makanunayong pagmisyon sa ubang dapit.”(EG, 28)

Ang mga simbahang lokal sa tibuok kalibutan, gibahin sa lainlaing parokya. Territoryo kini diin namuyo ang mga binunyagang katoliko. Busa ang tanang binunyagang katoliko sakop gayud sa usa ka parokya. Ug diri sa Pilipinas, ang mga parokya gilangkoban dili lamang mga Gkk, anaa usab uban pang klaseng gagmayng kristohanong katilingban nga dinasig usab sa mao rang Spirito Santo. Ang parokya maoy gisangonan sa pagtagad ug pagamoma sa tanan niyang ginsakpan nga mga magtotoo diha sa ilang mga gagmayng kristohanong katilingban.

Adunay mga katoliko nga wala masayod asa silang parokya. Anaa usab, dili lang pud sila gusto moapil sa ilang parokya human makadawat sa mga sakramento. Anaa usab kadtong nasayod kon asa sila nahisakop apan didto sa laing parokya sila mangapil tungod sa lainlain nga hinungdan ug kakulian.

Ang atong panghinaot karong tuiga, mao nga ang mga nagdumala sa parokya ug mga nangalgad niini, magpadayon nga adtoon ug doolon ang tanan sakop ug magpahibalo ug magawhag kanila nga magtagad ug mangapil kinabuhi ug misyon sa ilang tagsa-tagsa ka kaugalinging parokya, alang sa ilang kaayuhan ug sa uban. Nanghinaot kita nga mabati ug masinati sa tanan nga bililhon sila nga bahin sa kinabuhi ug misyon sa Simbahan.

Ang mga Gagmay’ng Kristohanong Katilingban nga anaa sa parokya dako kaayo nga ikatabang alang niining katuyuan. Sila ang dunay dakong papel nga mahimong tulay sa panaglambigitay tali sa mga Kristohanong banay ug ang parokya. Sila ang makapahiluna alang sa tanan nga managhiusa ubos sa pangama sa kura paroko sa parokya ug ubang nagalagad uban kaniya.

Busa, mangutana namong tanan, asa mo nga parokya, kinsay inyong kura paroko, ug asa mo nga GKK nahisakop. Pangapil namo didto ug magtinabangay kamo sa pagpalambo sa Kristohanong kinabuhi pinaagi sa parokya, uban sa parokya, ug diha sa parokya.