San Pedro Calungsod Fun Run: Kalampusan human ang kagul-anan

Zumba nga gipanguluhan sa mga estudyante sa Ma. Cristina P. Belcar Agricultural High School ang usa sa mga highlights sa bag-o pa lamang nahuman nga 1st Fun Run sa San Pedro Calungsod Quasi-parish.

Atol sa kinaunhang pista sa parokya, ang “Takbo para kay kuya San Pedro” niadtong Sabado, Oktubre 15, 2016 sa Baguio Proper, giapilan ug kapin 400 ka mga partisipante.

Matud pa ni Loren Lahoylahoy, ang Parish SoCCom nga “sa nilabay’ng duha ka semana, nakabati mi og kabalaka tungod kay 400 singlets ang among gi-order apan 160 pa lang ang registrants. Apan, gipanalanginan mi sa Ginoo ug sa tabang ni San Pedro Calungsod, among patron tungod naabot og sobra 400 ang registrants. Naglisod na ug nagkulang na hinuon ang singlets.”

Gipasabot sa mga ulahing nagparehistro nga mamahimo silang makadagan panahon sa fun run ug ipahabol na lang ang ilang singlet.

“Sa adlawng Sabado, alas-3:00 sa kadlawon nibundak ang ulan ug nakabati na sab mi og kaguol tungod kay layo pa nga mga GKKs gikan ang mga runners apan gidungog na sab sa Ginoo ang among pag-ampo, uban sa pangama ni San Pedro Calungsod kay niundang ang ulan pagka alas-3:30 sa kadlawon ug nakasugod mi sa hustong oras,” testimonya ni Loren. “Sa nahitabong fund-raising activity gisukod gayud ang among pagsalig ug pagtoo sa Ginoo.”

Sa pag-undang sa ulan, nagsugod na ang mga runners sa paglista sa registration area base sa ilang kategorya, ang 3K ug 5K. Gisugdan ang programa sa pag-ampo ni Lady Vanessa Cabang, usa ka lider sa mga batan-on. Nihatag sab sa Welcome Address si Anneza Pacomios, ang PSK Parish Coordinator. Gisundan dayon sa “zumba” aron sa warm-up ug stretching.

Niuna og dagan ang nisalmot sa 5K, Male ug Female Category, padulong sa Boundary sa Baguio ug Cadalian unya balik sa Baguio Gym. Nisunod ang 3K, padulong sa Purok Ilang-ilang unya balik sa Baguio Gym.

Pagbalik sa mga nanagan, nag “cool down” ang tanan nga gipanguluhan ni Ian Bernardino, sakop sa Immaculate Conception- Baguio.

Ang mga volunteers nanghatag sab ug ribbons ug tubig. Andam sab kaayo ang mga first aiders ug seguridad gikan sa Police ug Brgy. Police.

Ang mga nidaug nakadawat og premyo nga kwarta. Mao kini ang mga nidaug sa 5K Male Category: 1st – Kyle Live Cayog, 2nd – Welner Cayog, 3rd – Mark Anthony Severo.

Samtang sa 5K Female Category: 1st – Geraldine Dumandan, 2nd – Adja Limpio, 3rd – Janine Marie Galan.

Sa 3K Male Category: 1st – Kyle Ryoichi Cayog, 2nd – Charles Firmeza, 3rd – Ramil Sending.

Sa 3K Female Category: 1st – Leizle Ano, 2nd – Krystaline Cucharo, 3rd – Norma Morilla.

Mismong si Fr. Ricky Flores ang mihatag kanila sa papremyo.

Baguio Central Elementary School, Baguio National School of Arts and Trades, Ma. Cristina P. Belcar Agricultural High School, Malalan Elementary School, Tawantawan Elementary School ug Little Pearls of Heaven sa Buhangin, Davao City, DOLE Phils., Davao Agricultural Ventures (DAVCO), Singles for Christ, Handmaids of the Lord, PREX, Baguio Police Station, Baguio District Health Center, ug Baguio Barangay Council.

Ang Fun Run kabahin sa 1st fiesta celebration sa Parokya sa San Pedro Calungsod. Ang nalikom nga pondo gamiton sa pagtukod sa parish church. (SPCP SoCCom)